Imanol Garai alkateak "Sopelako Udalak kirolaren alde egiten duen apustua" ekarri zuen gogora. "Sopelan argi daukagu egin daitekeen inbertsiorik onena direla gazteria eta kirola. Beti egongo gara prest horrelako ekitaldiei gure babes osoa emateko", adierazi zuenez. Gainera, Arriatera hondartzak duen balioa ere azpimarratu zuen Garaik. Bere hitzetan, "gure kostaldeak balio turistiko geologiko handia du, kretaziko garaiko santutegia baita".
Aritz Larrinaga rider sopeloztarrak zorte ona opa zien lehiakide euskaldunei atzo, osteguna, Arriatera hondartzan egindako Sopelana BBK Pro 2010 txapelketaren aurkezpenean. "Emaitza ona lortzea benetan zaila da maila oso altua baita. Nik lortzen ez badut, euskal rider baten bat ikusi nahiko nuke azken itzulietan", adierazi zuenez. Amaury Laverhne bodyboarderra ere probaren mailaz aritu zen: "Urtetik urtera maila altuagoa da eta aurten ere oso gogorra izango da", esan zuenez. Azkenik, Jeff Hubbard iazko munduko txapeldunak ondokoak goraipatu zituen: "Antolakuntza oso profesionala da eta nazioarteko rider onenak lehiatuko dira, oso hunkigarria eta dibertigarria izango da". Txapelketari dagokionez, atzo 16:00etan izandako azken checking-aren ostean, gaur arte atzeratzea erabaki dute antolatzaileek. Hurrengo chekinga goizeko 8etan izango da. Metro bateko olatuak haize onarekin espero dira. Gaurko egitarauan Tow Out erakustaldia programatuta dago: lehiakideak ur-motorrarekin olatuen kontra bultzatzen dira, izugarrizko jauziak eginez. Argazkian, atzoko prentsaurrekoan egon ziren Imanol Garai alkatea, Josu Landaluze alkateordea, Alex Bartolome BBK-ko ordezkaria, Aritz Larrinaga Euskal Bodyboard Eskolako kide eta lehiakide sopeloztarra, Amaury Laverhne egungo rankingaren liderra eta bi aldiz Sopelana BBK Pro munduko probako txapelduna eta Jeff Hubbard iazko munduko txapelduna / © Sopelana.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun