Txakolinaren Bideak aipatu ardoaren prozesua ezagutzeko aukera eskaintzen du, mahastian dagoenetik botilaratzen den arte. Bide batez, produktu horrekin lotuta doazen jarduera ekonomikoen bidetik, Urdaibaitik zehar ibilbide atsegin bat egingo da, bertoko historia, ohitura eta kondairak ezagutuz: Gorrondona baserrira bisita, Gaztelugatxe, Portuondo (Mundaka), Foruko erromatarren herrixkaren aztarnategia, Madariaga Dorretxea, Izaro irlarantz itsasontziz, Bermeon Aita Guria baleontzira bisita…
Erregeen Bidea
Erregeen Bidea Bizkaiko jauregi multzo batek osatzen du. Lurraldeko erabaki politiko, administratibo edo gizartearekiko guztiak batzar nagusietan erabakitzen ziren... Hasieran batzar horiek Lumoko elizateko hariztipean egiten ziren. Geroago, Antiguako Amaren baselizan, hariztiaren ondoan. Jauregiaren oinordekoa, XV. mende erdikoak diren usadio eta ohitura ziren lege batzuk zin egin ondoren baino ez zen Bizkaiko jauna onartua izaten. Jaun berriak, zin ibilbidea egin behar izaten zuen, Bermeoko Eufemi deunaren zin elizan amaitzen zena. Erregeek antzina egiten zuten ibilbide bera egiten du txangoak, Gernikatik hasi eta Bermeoraino: Gernikako arbola eta juntetxea, Foruko erromatar herrixka, Busturiako Madariaga Dorretxea, biodibertsitatearen interpretazio zentroa, Bermeoko alde zaharra, bertoko arrantzaleen museoa, Ertzilla dorretxea…
Bi ibilbide turistiko kultural euskaraz egiteko aukera emango du, hurrengo hilabeteetan, Uribe Kostako Zerbitzu Mankomunitateak. Horrenbestez, irailaren 25rako, larunbata, Urdaibai ingurura antolatu du txangoa, Txakolinaren ibilbidea egiteko asmoz. Urriaren 9an (larunbata), berriz, Erregeen Bidea deritzen Bizkaiko jauregi multzora joango dira bisitan. Lehenengo txangora joan nahi dutenek 35 euro ordaindu beharko dituzte; eta bigarrenerako 10 euro. Batean zein bestean, goizeko 9ak inguruan abiatuko dira. Hala ere, ordutegi zehatzak eta geltokiak irailean zehaztuko dira, Mankomunitateko arduradunek adierazi dutenez. Gauzak horrela, abuztuaren 30etik irailaren 8ra arte egongo da zabalik izena emateko epea. Plaza mugatuak dira. Beraz, komeni da lehenbailehen apuntatzea. Txangoei buruzko informazio gehiago Mankomunitateko bulegoan (Gatzarrine, 2. Larrabasterra) banatuko diren orrietan izango da eskuragarri. Argazkian, Bakioko Gorrondona baserrian txakolina nola egiten den erakusten dute / © Doniene Gorrondona Txakolina.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun