Garabiak eramandako ibilgailu gehienak, zortzi, Algortako Arriluze eta Ereaga aldean zeuden aparkatuta. Gainontzekoak Gobelaurre, Bidezabal eta Olarretxe kaleetan. Guztira, Getxoko Udaltzaingoak kalean salgai zeuden ehun auto inguru aurkitu zituen aipatu epealdian. 2009an zehar, berriz, 75 izan ziren eta horietatik 12 eraman zituen garabiak. Bestalde, 48 salaketa-agiri bideratu zituzten.
Autoen behaketa
Udaltzainek kalean “salgai” kartela bistan duten ibilgailuen behaketa egiten dute egun batzuez, "autoa leku berean, mugitu barik eta begi-bistako kartelarekin jarraitzen duela ikusteko". "Ondoren, ibilgailua udal-gordailura eramango dute eta dagokion salaketa ipiniko diote, bide publikoan merkataritzan jarduteagatik", jakinarazi dute Udalekoek. Bestalde, gordailutik atera ahal izateko, autoaren bila doan pertsonak ibilgailua bere izenean dagoela egiaztatzen duten agiri guztiak aurkeztu behar ditu. "Egungo jabea, alegia, salgai ipini duen pertsona titularra ez bada, bere izenean ipini beharko du edo Trafikoko Zuzendaritza Probintzialean agertzen den jabeak lagundu beharko dio udal gordailura, autoa atera ahal izateko", azaldu dutenez. Egun gai hori arautzen duen trafiko araudirik ez dagoenez, prestatzen ari diren trafiko udal ordenantzaren zirriborroan balizko egoera guzti horiek jasoko dira eta salaketak egin, autoak atera eta beste ekintza batzuk egin ahal izango dira, egungo Merkataritzako Jardueraren Legean ez ezik udal ordenantzan ere oinarrituta.
Bide publikoan salgai zeuden 13 ibilgailu erretiratu ditu aurten Getxoko Udaltzaingoak
Bide publikoan "salgai" kartela ipinita zeukaten 13 ibilgailu erretiratu ditu aurten Getxo udalerriko kaleetatik Udaltzaingoak, Hiri Segurtasuneko Sailak jakinarazi duenez. Auto horiek garabiak eraman eta udal gordailuan utzi zituen, urtarrilaren 1etik uztailaren 31a arteko epean. Egoera horren ondorioz, Udalak 11 espedienteri hasiera eman die aurten, eta horietako 5 zigorra ezarrita itxi ditu, "ibilgailua autoak saltzeko dendetatik kanpo saltzeagatik", EAEko Merkataritza Jardueraren gaineko Legeak ezarritakoaren arabera. Zigor hori, kasu gehienetan, 300 euroko isuna izaten da. Hasiera eman zaien gainontzeko espedienteen izapideak bideratuta daude. Argazkian, garabi bat auto bat eramaten Leioan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun