Hondartza bizi! programak joan den ekainaren 21etik egunero hainbat ekimen eskaini die Ereaga hondartzako erabiltzaileei. Aldi horretan haur ludoteka eta futbol, boleibol, badminton eta petankarako kirol zelaiak izan dira jarduera finkoak. Gainera, malabarismo tailerrak, golfean hastekoak, kirol alternatiboak, ohiko jokoak, herri kirolak, eta abar ere egon dira.
Getxoko Udalak programari eusteko Ereaga hondartza hautatu zuen joan den urtean, bere 882 metroekin udalerriko luzeena delako, erabilienetarikoa delako (2008an 141.000 bisitari jaso zituen), garraio publikoak eskura daudelako eta Getxoko bi baliabide turistiko nagusi diren Portu Zaharra eta Kirol Portuaren artean kokatuta dagoelako.
Bihar, igandearekin, bainu denboraldia bukatu eta Algortako Ereaga hondartza dinamizatzeko Hondartza bizi! programa amaituko da, jai batez. Getxoko Udaleko Turismo Bulegoak pasa den ekainaren bukaeran martxan jarritako ekimena agurtzeko egitarau zabala antolatu dute. Horrela, 11:00etatik 13:00etara eta 16:00etatik 18:30era, umeek zein helduek bertan jarritako karaokeaz, puzgarriez eta gizaki mahai-futbolaz gozatzeko aukera izango dute, ohiko zerbitzuez baliatzearekin batera: umeentzako ludoteka, bolei zelaiak, hondartza-boleia, irakurtzeko txokoa, eta abar. Argazkian, Ereagako hondartzaren irudi bat, pasa den ekainean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun