Gizarte ereduen arteko borrokaren aurpegietako bat da jai ereduen artekoa. Parte-hartzea da hitz gakoa bi ikuspegitatik.
Lehenengoa Urkulluk "ezker abertzalearen presentzia sozial saihestezina" deitzen dionaren aurkako gerra da. Politikoa baino gehiago borroka sozioekonomikoa. Gizarte zati baten boteregune gehiago desagerrarazteaz gain, kulturgintzak mugi lezakeen dirurik gehiena eskuratzeko enpresa sare kontrolatua gura dute jai batzordeen lekuan. Badakite ideologikoki zein jende mota dagoen kulturgintzan, baina baita zein baldintza eskasetan gabiltzan ere. Baliabideak kontrolatuta koadratu nahi dute borobila.
Bigarrena ere parte-hartzeari dagokio. Ez naiz nekatuko esaten bozgorailuak, eta euren bolumena direla herri kulturaren etsairik handienak. Gainerako programatik kanpoko adierazpen herrikoi mota guztiak zaildu eta komunikazioa monopolizatzen dute. Asko eskatzea izan liteke munduari bizkarra ematen dion koadrila formazio borobilean bizi den herri honentzat, baina parte-hartzea ezin liteke ostalaritza ludikora mugatu. Jaiak bere funtzioa bete dezan, pertsonek beren barrua era sortzailean askatzeko bideak aurkitu behar dituzte. Gure lekuan adierazten diren eta komunikatzaile pasibo bihurtzen gaituzten bozgorailu, pantaila, ordenagailu eta tresnen atzean ezkutatu beharrean.
Fredi Paya bertsolari algortarrak pasa den ostiralean "Berria" egunkarian argitaratutako artikulua.
[© Fredi Paya - Berria.info] Titiriteroontzat euskal kultura aste barruan lan egitea da, asteburuetan lan egin ahal izateko. Sortzea eta jaiotzea gauza bera da. Jaiotza jaia da, berez, eta jaietan jaio egiten gara, beraz. Gizarte nahiz gure bizitza pertsonaleko gaitzez isolatu eta barruan zer dugun ikusteko errituak dira, gure jokaera kontraesankorren zergatiak ulertu gura izateko ausardia izanez gero, behintzat. Eta ausardia mota hori da sorkuntzaren bideetan ibiltzeko behar den argia. Ondorioz, ulertzekoa da zergatik den, aste osoan nekatuta egon arren ere, beharrizana titiriteroontzat asteburuetan lan egitea. Lana porlan kilo eta ordenagailu aurreko orduetan soilik neurtzen dakien gizarte honek ulertu ez arren. Argazkia: cc-by Algortako San Inazioetako Jai Batzordea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun