Erandio Landako udaletxe zaharra berriztatzeko lanak "atzeratuta" doazela salatu du Javier Ruiz PPko tokiko bozeramaileak. Etxe horren atzeko aldea eta estalkia berritu behar dituzte. Izan ere, egoera txarrean daude eta alboan dagoen Goikolanda ikastetxeko patiora teila zatiak zein horma azalaren zatiak erori izan dira inoiz. Hala ere, Erandioko Udala "ezin justifikatuzko atzerapenaz" ari dela kritikatu dute popularrek. Ruizen hitzetan, "obrak eskola-umeen opor garaian egingo zituela hitzeman zuen ekainean tokiko erakundeak. Baina, ikasturtea hastear dagoenean, izapideak berandu doaz". PPkoaren arabera, "Udalak orain abiatu du lizitazio agiria. Gauzak horrela, epeak epe, ez dugu uste lanak azaroa baino lehen hasiko direnik, ikasturtea hasi baino lehen amaituta egon behar zutenean". Argazkian, Erandio Landako udaletxe zaharra / © Erandioko Udala.
Egoera horretan, eskola-umeak izango dira kaltetuak, popularren arabera, "segurtasuna bermatze aldera, ikastetxeko jolastokietako bat itxi beharko dutelako, obrak iraun artean". Halaber, epe horretan, beharrezkoak diren segurtasun neurriak hartzea eskatu dute. Erandioko Udalak 170.000 euroko diru partida onartu zuen 1890ean eraikitako Erandio Landako udaletxe zaharra berriztatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun