Bizkaiko Foru Aldundiak sustatutako Ondarearen Europako Jardunaldiekin bat egingo du aurten, lehenengo aldiz, Sopelako Udalak. Urrian zehar hainbat jarduera izango dira, esate baterako, hitzaldi, erakusketa eta bisita gidatu bana. Solasaldian, udalerrian egin diren lan arkeologiko guztiak azalduko dituzte, Joxe Miguel Barandiaran joan zen mendearen hasieran ikerketak egiten hasi zenetik gaur egunera. "Hortaz, aurkitutako aztarnekin, gure herriaren iragana berreraiki ahal izango dugu; Erdi Paleolitikotik Erdi Arora, Goi Paleolitikotik, Mesolitikotik, Neolitikotik, Burdin Arotik eta Erromatar Garaitik igaroz", zehaztu dute udal iturriek. Jardueren datak oraindik ez daude zehaztuta, baina informazioa Sopelako udal webgunean jarriko dute laster; eta urritik aurrera Turismo Bulegoetan edo 944 065 519 telefono zenbakian. Argazkian, gure eskualdeko ikuspegietako bat.
Erakusketaren bitartez, udalerriaren historia erakutsiko da, bere lehenengo biztanleek utzi zituzten aztarnak jarraituz. Aipatu aztarnak, hainbat arkeologok Azkorri eta Barinatxeko labarretan, Munarrikolandan, eta herrigunean azterkatu dituzte; eta horiei esker, ikusi ahal izango da Sopelaren bilakaera orain dela 40.000 urtetik gaur egunera arte. Azkenik, bisita gidatua Munarrikolandatik ibilbidea izango da. Bertan, orain dela 5.000 urte herritarrek eraiki zituzten hilobiak aurkitu daitezke. Gainera, nola eraiki zituzten ikasiko dute parte-hartzailek. "Oso zaila da hilobi hauek ikustea. Arrazoi nagusia eraiki zutenetik igaro den denbora da. Urteak aurrera joan ahala, aztarnak hondatuz joan dira. Horregatik, erne ibili behar da hilobiak ikusteko", azaldu dute tokiko arduradunek. Bueltan, Santa Mariñe baseliza, Erdi Arokoa, eta Fraidemendiko monolitoa, “Munarri” izenez ezagutua, bisitatuko dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun