Metro Bilbao garraio enpresako LABen atal sindikalak ohar bidez zabaldutakoaren arabera, joan den astetik hona gutxienez lau langileri jakinarazi diete kalera joango direla. Gidariak eta geltokietan bezeroekin zuzenean ari diren beharginak lirateke kaleratuak. Kontratuak irailean amaituko zaizkie. Enpresako zuzendaritzak langile-gastuak murriztu nahi dituelako ez dizkiete berrituko kontratuak. Horrela azaldu omen diete, behintzat, kaleratutako lagunei Metro Bilbaoko arduradunek. Hala ere, LAB Metro Bilbao "harrituta" azaldu da argudio horren aurrean, "are gehiago azkeneko hilabeteetan zuzendari gehiago sartu eta aholkulariak hartu dituztenean". Kaleratze gehiago izan daitezkeela ohartarazi du sindikatu abertzaleak: "10 baino gehiago". Gauzak horrela, LAB Metro Bilbaok gai hori ere sartuko du enpresa batzordeak bihar, asteazkena, egingo duen bileran, indar sindikal guztiek kaleratzeen kontrako mobilizazio kanpainari ekin diezaioten. Argazkian, Aste Nagusia baino lehen ordurako aurreikusitako greba bertan behera uztea erabaki zuten metroko langileek / © Koska irratia.
LAB Metro Bilbaok azaldu duenez, "2008an sinatu zen azkeneko hitzarmen kolektiboan gidarien eta geltokietako langileen kolektiboak indartzeko 33 pertsona sartuko zirela itundu zen, ibilbidea luzatu eta geltoki gehiago irekiko zirela aurreikusita". Gauzak horrela, "harrigarritzat" jo dute datozen bi urteotan lau geltoki berri irekiko badira (Ariz, Basauri, Ibarbengoa eta Kabiezes), orain daudenak baino langile gutxiago behar izatea. "Geltoki bakoitzean gutxienez hiru pertsona aritzen dira txandaka eta, ondorioz, 12 pertsona beharko dira. Ibilbideak ere kilometro gehiago izango ditu eta, bidaiak luzatzen badira, gidari gehiago beharko dira trenak eroateko", gaineratu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun