Lamiako auzoan 55 etxebizitza hartuko dituzten eraikin bi egiteko baimena eman berri du Leioako Udalak. Lamiako-Txopoetako Barne Erreforma eta Birgaitze Plan Bereziaren (BEBPB) bigarren fasearen barruan kokatzen da aipatu ekimena, lehenengoa orain dela gutxi amaitu eta gero, tokiko iturriek zehaztu dutenez. Proiektu potolo horretatik kanpo, baina eremu horren hiri berroneratzearen ekintza orokorrari lotuta, uda honetan Langileria kalearen beste aldean kokatzen ziren eraikin gehienak eraitsi dituzte, Delta de Lamiako eta LAN lantegiak barne, eta sortutako orubeen zelaitzea ere egin dute. ALESA lantegia botatzea baino ez da falta. Horretarako, bere jarduerarekin jarraituko duen tokira aldatu beharko da, iragarpenen arabera urtea amaitu baino arinago burutuko dena. Eraiste horiek Lamiako-Txopoetaren irudi berria utzi dute: "birgaikuntza prozesuaren lehen emaitzak ikusten hasi dira, etorkizuneko irudia gero eta hurbilago izanik", udal arduradunek aipatu dutenez. Argazkian, Lamiakoko egungo irudia / © Leioa.net.
Lamiako-Txopoetako Barne Erreforma eta Birgaitze Plan Berezia hiri-berrikuntzarako jarduera da, Langileria kaleak elkartzen dituen bi auzoak berriztatzeko hain zuzen ere. Horren barruan bi fase desberdin daude, baina elkarrengandik oso lotuta. Lehen fasean, batetik, etxebizitza zaharrak eraitsi; eta bestetik, salmenta libreko etxebizitzen eraikina altxatu dute. Azkenik, babes ofizialeko etxebizitzetako eraikina egin dute, aipatu eraispenetan etxe barik geratu ziren auzoko herritarrak sartzeko. Guzti hori gaur egun amaituta dago jada. BEBPBren bigarren faseak gainontzeko etxebizitza libreen eraikin berriak altxatzea hartzen du, horrekin batera inguruetako egokitzapena ere sartzen dela. Lehen aipatu baimen berria bigarren fase horretako lehen urratsari dagokio.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun