Efren Vazquez eta Herri Torrontegi omenduko dituzte larunbatean Gorlizen
2010ko ira. 8a, 15:10
Larunbat honetan, irailak 11, Efren Vazquez Derbi taldeko moto gidari bilbotarrari eta bere maisu Herri Torrontegiri egingo diete omenaldia. Izan ere, azken horren herrian, Gorlizen, antolatu du topaketa Stroopers motorzaleen elkarteak. Jardunaldia 10:00etan hasiko da eta 500 motorzale baino gehiago batzea espero dute antolatzaileek. Ekitaldien artean, motorrez 60 kilometro inguruko ibilbidea egingo dute Gorliz inguruko udalerrietan, Vazquez eta Torrontegi lagun dituztela. 20:00etan, berriz, egungo Europako trial txapeldun Jaime Busto gorliztarrak erakustaldia egingo du. Topaketan parte hartu nahi dutenek 10 euro ordaindu beharko dituzte. Horrek aukera emango die kamiseta oroigarria eskuratu zein jardunaldiari amaiera emango dion afarian izateko. Hala ere, hurrengo egunean, igandean, Plentzian izango dute lehiaketa-motor klasiko eta berrien erakusketa zaleek. Argazkian, Efren Vazquez motor gainean / cc-by-sa Adriaa4.Plentziaclassic elkarteak antolatuta, ia 40 motor bilduko ditu erakusketak. Goizeko 10etatik aurrera egongo dira ikusgai Eleiz plazan. Bi gurpildunen artean, 1948ko AJS 350 bat, Guy Bertin pilotu frantziarrak 1987ko Munduko Txapelketa jokatu zuen Honda RS-250R motorra eta Torronteguiren Krauser-a izango dira bertan. Azken hori Gorlizen ere egongo da ikusgai larunbatean. Motor horrekin, 1989an bi lasterketa irabazi zituen pilotu gorliztarrak. Kontinentearteko txapela gertu izan zuen. Hala ere, ez zuen irabazterik izan. Azkenik, Tuenti Derbi Racing taldearen kamioia ere izango da Gorlizen. Besteak beste, kaskoa, eskularruak eta botak zozketatuko ditu Efren Vazquezek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun