Ismael Moreno Espainiako Auzitegi Nazionaleko epaileak debekatu egin du Adierazi EH! herri ekimenak larunbat honetarako "Denontzat eskubide guztiak Euskal Herria osoan" lelopean deitua zuen manifestazioa. 14:00etan eman du erabakiaren berri epaileak. Baina Adierazi EH! herri ekimenak 17:00etan emandako prentsaurrekoan jakinarazi du manifestazioa egin egingo dela, eta horretarako beharrezko izapideak egiten dabiltzala. "Indarberritutako deia" egin du Adierazi EH!-k horrela. 130 bat lagun izan dira prentsaurrekoan, eta Rafa Larreinak eta Arantza Fernandez de Garaialdek hitz egin dute. "Inoiz baino garrantzitsuagoa da eskubide guztien alde egitea". Izan ere, euren hitzetan, atxikimendua eman duten 42 alderdi eta elkarteak "isilaraztea" ez dute lortuko. Espainiako Gobernuak izendatutako Javier Zaragoza fiskal nagusiak aurkeztu zuen atzo debekuaren eskaera, Adierazi EH!-ri Batasunaren "oinordekoa" izatea "eta ETAren aginduak" jarraitzea egotzita. Manifestazioa orain dela lau hilabete deitu zuen herri ekimenak eta bitartean atxikimendu zabala eta askotarikoa eskuratu du. Besteak beste, ezker abertzalea, Aralar, EA, Alternatiba, Lokarri, ELA, LAB, Etxerat, GaztEHerria eta EAE-ANV-k bertaratzeko deia egin dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun