Getxoko Udalak kanpainan gogoratzen du euskara ikasteko diru-laguntza hainbat eredu dituela. Alde batetik, 12 urte edo gutxiagoko seme-alabak dituzten gurasoei, haur zaintzaileei edo haurrak zaintzen dituzten familiartekoei, pediatrian eta ginekologian lan egiten duten sendagileei eta erizainei, haurtzaindegietako langileei eta ikastetxeetan irakasle ez diren langileei eta haurrekin zerikusia duten beste langile mota batzuei zuzendutakoak daude. Bigarrenez, ikasketak amaituta, lan-merkatuan sartu nahi duten 18 eta 23 urte bitarteko gazteentzakoak. Azkenik, oinarrizko maila duten eta sakondu nahi dutenei ere emango diete laguntza.
Bestalde, etorkinak euskarara eta euskal kulturara hurbildu nahi dituzten AISA ikastaroen onuradunei diru-laguntzak ematen segituko du Udalak. Getxo da Araba, Bizkaia eta Gipuzkoa mailan ikasleen eta taldeen kopuru handiena duen udalerria, tokiko arduradunek azpimarratu dutenez. Orain arte, aurreko 5 ikasturteetan 346 lagunek parte hartu dute. Era berean, merkatariei eta ostalariei zuzendutako Dendaketan ikastaroak astean birritan antolatzen segituko dute. Aurreko hiru ikasturteetan 37 pertsonek parte hartu dute. Guztira 2009an 385 getxoztarrek jaso zuten euskara ikasteko diru-laguntza. Udalak guztira ia 100.000 euro banatu zituen.
Euskaltegien eskaintza
Udalerriko euskaltegiek, maila desberdinetako ohiko eskaintzaz gain (5 orduko ikastaro trinkoak, 2 ordukoak, EGA, hizkuntza-eskakizunak...) berritasun batzuk ere jarriko dituzte martxan. Horien artean, udal euskaltegiak laugarren maila (Administrazioaren hizkuntz-eskakizunaren baliokidea) prestatzeko ikastaro berezia egingo du. Bestalde, J.A. Agirre euskaltegiak EGA azterketa prestatzeko ikastaroa larunbat goizetan eskainiko du eta Lauaxeta euskaltegiak ikastaro mistoa, hau da, eskola batzuk euskaltegian eta gero beharrak etxean egin. Gogoratu, Uztarri euskaltegiak 6 eta 16 urte bitarteko haurrentzako eskolak ematen dituela.
“Denok batera, euskara aurrera! Animatu eta zatoz euskaltegira” lelopean, aurten ere kanpaina abiatu du Getxoko Udalak, herritarrak euskara ikas dezatela sustatzeko asmoz. Ekimena euskaraz bizi nahi duten herritarrei horretarako aukerak bermatzeko konpromisoaren harira dator eta, ildo horretan, tokiko erakundeak uste du euskaltegiak herritarrak euskalduntzeko lan handia egiten ari direla eta gainera gizartearen aldaketetara egokitzen jakin dutela, ikasleen kopuruak mantentzeko bide berriak topatuz eta eskaintza berriak eskainiz. Herritar talde desberdinei zuzenduta dago kanpaina, tartean, gazteei, dendariei, gurasoei eta etorkinei. Aurreko ikasturteko aipatu kolektiboetako lau ikasleen irudietan oinarrituta, udal euskaltegian, Lauaxeta AEKn, Jose Antonio Agirren edo Bai&Bai zentroan matrikulatzeko diru-laguntzen berri ematen du egitasmoak. Izen-emateko epea urriaren 1ean amaituko da. Informazio gehiago lortzeko, interesatuek aukeratutako euskaltegira jo dezakete edo Getxoko Udaleko Euskara Zerbitzura. Bere telefono zenbakia 944 660 010 da. 2009-2010 ikasturtean 1.133 lagunek ikasi zuten euskaltegi getxoztarretan, 86 taldetan banatuta. Argazkian, Algortako Jose Antonio Agirre euskaltegia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun