Haurrentzako lekurik ez da faltako bihar jaialdian, eguerdian, 12:30ean, Andres Isasi Musika Eskolako bandak saio didaktikoa eskainiko baitie. Taldeak 9 eta 17 urte bitarteko 45 instrumentista biltzen ditu eta musika ikasketak osatzen joatea da bere helburua. Bandaren jarduerak musikarako belarria, taldeko sonoritatea, elkarrizketa musikalaren zentzua, zehaztasuna eta bat-etortze musikala garatzea bultzatzen du. Nahiz eta hasiera batean Santa Eugenia plazan programatuta egon, lekuz aldatu dute kontzertua eta Areetako Xake plazako karpan izango da.
Bestelako jarduerak
Bihar, azken aukera izango dute bisitariek Bidezko Azokaz gozatzeko. Bidezko Merkatua Iparraren eta Hegoaren arteko bidezko merkataritza sustatzen duen ekimena da, zenbait GKErekin batera antolatzen dena. Bestalde, hainbat herrialdetako artisautzako produktuak Munduko Azokan egongo dira salgai, Koan elkartearen lanari esker. Halaber, beste kultura eta herrialde batzuetako gastronomia ere dastatzeko beta izango da bihar azken aldiz Munduko Terrazan, Euskadiko Munduko Medikuak erakundearen eskutik. Azkenik, kale-banden azken desfilea 19:00etan irtengo da Bizkaiko Zubiko plazatik.
Getxoko Nazioarteko Folk Jaialdiari amaiera ezin hobea emango dio bihar, igandea, Xabi Aburruzaga trikitilariak. 20:30etik aurrera, “Denboraren naufrago” azken diskoa aurkeztuko du Areetako Xake plazan, artista gonbidatuen laguntzaz. Eguneko egitaraua Efeleson talde mexikarraren kontzertuaz (Itzubaltzeta / Romoko Santa Eugenia plazan, 18:30ean) eta Andres Isasi Musika Eskolako bandaren saio didaktikoaz (Areetako Xake plazan, 12:30ean) borobilduko dute. "Denboraren naufrago" azken lanean, entzuleak ametsezko bidaia musikaren bidez egitera gonbidatzen ditu Xabi Aburruzagak. Biharko saioan, gonbidatutako hainbat artistarekin batera arituko da: Oskorri taldeko Antton Latxa eta Natxo de Felipe, Mikel Markez, Amaia Oreja eta Oreka TX txalapartarien bikotearekin, besteak beste. Efeleson taldeari dagokionez, 1996an sortu zen jatorriz Fuerza Latina izenarekin, musika afro-karibetar garaikidea, Kubako, Puerto Ricoko eta Kolonbiako musika interpretatzeko asmoaz. Argazkian, Xabi Aburruzaga / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun