Arratsaldeko kontzertuei dagokienez, emaitza paregabea lortu dute, Itzubaltzeta / Romoko Santa Eugenia plazako karpa behin baino gehiagotan bete dute eta. Aurten, Extremadurako Barrunto Bellota Band bikotea, Gaizka Baenaren taldea eta La Bruja Gataren fusio doinuak eta erritmo latinoak interpretatzen duen Efeleson talde mexikarra izan dira bertan. Egun bakoitzeko eskaintzari amaiera ematen zioten Munduko Terrazako saioek ere lagun ugari bildu dituzte. Bertan, Judith Mateoren eta La Selva Sur taldearen saioaz gozatzeko aukera izan dute bertaratu direnek.
Bestelakoak
Jaialdian ez da haurrentzako ikuskizunik falta izan. Aurten arrakasta handia lortu du Andres Isasi Musika Eskolako banda. Bestalde, kale-bandak Getxo udalerrira etorri dira aurten ere; lau egunetan, kaleetan jardun dira atsedenik gabe eta, pasa den larunbatean, milaka lagun bildu zituzten Bizkaiko Zubiko plazan hasi zen desfile ikusgarrian. Azkenik, gune solidarioak jaialdiaren gune arrakastatsuenetariko bat bilakatu da. Munduko eskulangintza, Bidezko Merkataritza eta hainbat gastronomia bildu dira bertan, besteak beste. Halaber, Getxoko Udaleko Immigrazio Zerbitzuaren Kulturen Gunea eta zenbait elkartek eta GKEk antolatutako ekimen eta jarduerak ezinbestekoak izan dira aurtengo jaialdiaren arrakasta lortzeko.
Ladysmith Black Mambazo eta Oysterband taldeen saioak izan dira arrakastatsuenak Getxo Folken
Getxo Folk jaialdiak 25.000 bat lagun bildu ditu aurten, antolatzaileek adierazi dutenez. Xabi Aburruzagaren azken diskoaren aurkezpenarekin amaitu zen atzo jaialdia. Ekitaldi horretan zenbait euskal musikari aritu ziren trikitilari bizkaitarrarekin elkarlanean. Bestalde, lau egunetan, 11 saioz eta kale-banden desfileez gozatzeko aukera izan dute folk zaleek, jarduera solidarioak ahaztu gabe. Azken horien artean, Bidezko Azoka, Munduko Azoka eta Kulturen Gunea aipatu behar dira, "jai giroa eta kulturen arteko harremana bultzatu dutelako", Getxoko Kultur Etxekoen arabera. Areetako Xake plazan izan diren kontzertu nagusietan, musika eskaintza anitza eta kalitatekoa izan da. Saio guztien artean Ladysmith Black Mambazo Hegoafrikako taldearena nabarmendu dute antolatzaileek, bertan jarritako karpa ia-ia bete zelako. Halaber, osteguneko saioak ere, Oysterband talde britainiarrarenak, zale ugari bildu zituen. Kontzertu nagusien eskaintza Mahala Raï Bandaren orkestra errumaniarraren doinu balkanikoez eta Xabi Aburruzagaren trikitiaz osatu zuten. Argazkian, Ladysmith Black Mambazo aho-musika taldea / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun