Erika Bilbao, komisarian, inkomunikazioan, "torturatua izateko arriskuan" egon bitartean, egunero elkarretaratzea egingo dute 19:00etan Erandioko metro geltoki aurrean eta 20:00etan manifestazioa egingo dute Leioako Boulevardetik. Bestalde, Donostian emandako prentsaurrekoan jakinarazi dute atxilotuen senideek larunbatean, hilak 18, lurraldeko manifestazioa izango dela Bilbon, 17:30ean, Jesusen Bihotzetik abiatuta.
Erandio eta Leioako mobilizazioen argazkiak:
Gaur arratsaldean 90 lagun inguruk egin dute elkarretaratzea Erandioko metro geltokiko zabalgunean, Fernando Grande-Marlaska epailearen aginduz atzo Guardia Zibilak burututako Erika Bilbaoren eta beste zortzi lagunen atxiloketak salatzeko asmoz. Ordu bete beranduago, 225 bat lagun abiatu dira manifestazioa Leioako kaleetan zehar. Ibilbide guztian zehar atxilotuen aldeko eta PSOEren zein polizia indarren kontrako ohiak izan dira nagusi. Sozialisten Leioako egoitzara iristear zirela, berriz, Bulebar ingurura joateko agindu diete manifestariei bi furgonetetan heldutako dozena bat ertzainek. Amnistiaren Aldeko Mugimenduko kideek salatu dutenez (mp3), "hemen edo Madrilen ote dauzkaten" ere ez dakite Erika Bilbao zein beste zortzi lagunen senideek. Bestalde, abokatuek eskaturiko tortura ekiditeko neurriei ezezkoa eman die Grande-Marlaskak, "torturatuak izateko arriskua areagotuz". Argazkian, ertzainek zainduta amaitu da Leioako manifestazioa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun