Getxo Antzoki berriko azpiegitura, makineria eta azpiegitura eszenikoko lanak agintzeko txostena baliogabetzea eskatu du gaur Getxoko PPk. Horretarako, mozioa aurkeztu du, ostegun honetako udal batzarrari begira. Tokiko Gobernu Batzordeak eman zion onespena txostenari, irailaren 27an, 91.551,73 euroko zenbatekoan. Marisa Arrue popularren bozeramaileak, ordea, berriro ere "legea urratzea eta udal batzarraren kontrola saihestu nahi izatea" egotzi die agintari getxoztarrei, obrak fase ezberdinetan esleitzen ari direlako, "Estatuko kontratu legeak zehaztutakoa ez betez". PPkoen ustez, egungo proiektuak ez ditu Getxo udalerriak dauzkan beharrizan kulturalak asebeteko. Arrueren arabera, "azpiegitura berriek ez dute ekitaldi handiak hartzeko balioko; hortaz, karpak udalerriko plazetan izaten jarraituko dugu, horrek dakarren gastuarekin". Argazkian, Getxo Antzokia eraikitzeko lehenengo fasea / © San Nikolas Auzo Elkartea.
Horrekin batera, proiektuak "egungo getxoztarren eta euren seme-alaben etorkizuna arriskuan jarriko duela" uste du Getxoko PPko bozeramaileak. "Bideragarritasun ekonomikoko txostena eskatu dugun arren, horri uko egin dio behin eta berriz alkateak. Horrelako txostenik ez dagoela pentsatzen hasiak gara", azaldu du Arruek. Bestalde, "proiektu erraldoiak inguruko bizilagunen bizi-kalitatea kaltetuko duela" uste dute popularrek, "eraikina sartzen ez den leku batean jarri nahi dutelako".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun