Bihar, ostirala, Erandioko Lutxana auzoko jaiak hasiko dira. Arratsaldeko 7etan, festei hasiera emango diete ohiko txupinazoa dela medio. 21:30ean, berriz, pintxo dastaketa izango da bertara hurbilduko direnentzat. Behin sabela beteta, ordu erdi beranduago, 22:00etan, mahai-futbol txapelketari ekingo diote lutxanatarrek. Ondoren, gaua alaitzeko, 23:00etan dantzaldia izango dute. Hurrengo egunean, larunbatarekin, goizeko 11:30ean haurrentzako jolasak izango dira. Eguerdian, ordea, tortilla txapelketaren txanda helduko da. Baina hori ez da goizeko lehiaketa bakarra izango, 12:30ean igel txapelketaren norgehiagoka hasiko baita. 14:30ean, herri bazkariaz gozatu ahal izango da. Eguna borobiltzeko, 20:00etan mozorro lehiaketa burutuko dute. Azken egunean, igandean, eguerdian Erandioko Udal Musika Banda arituko da auzoko kaleetan. 17:30ean, umeentzako pailazoak arituko dira eta ordu erdi beranduago, mus txapelketan arituko dira kartetan jolastea gustuko dutenek. Azkenik, jaiei amaiera emateko, 19:00etan, auzotarrek txokolatada egingo dute. Argazkian, Erandioko Udal Musika Banda arituko da igandean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun