Gaur, osteguna, hiru egun bete dituzte Guardia Zibilaren eskuetan inkomunikatuta asteartean atxilotutako Erika Bilbaok eta beste zortzi euskal herritarrek. Oraindik, ordea, haien berririk ez dauka senide eta lagunek, Amnistiaren Aldeko Mugimenduak (AAM) adierazi duenez. Eta litekeena da inkomunikazio aldia luzatzea. Gaur bertan Iñigo Lamarca Arartekoari zein Francisco Javier Eneriz Nafarroako Herritarren Defendatzaileari –idazkari batek hartu du salaketa– helarazi diete euren kezkak. "Atxilotuek torturak jasaten ari daitezkeela" ohartarazi diete. Auzitegi Nazionalari "atxilotuen segurtasuna berma dezala" eskatuko dioneko hitza eman die Lamarcak, Torturaren Aurkako Taldeak ezagutzera eman duenez. Dena den, bihar ere elkarretaratzea egingo dute 19:00etan Erandioko metro geltoki aurrean eta 20:00etan manifestazioa egingo dute Leioako Boulevardetik. Gaur 60 eta 200 bat herritar batu dira, hurrenez hurren. Argazkian, atzo bezala, gaur Leioako PSE-EEren egoitzara heltzea galarazi diete manifestariei dozena bat ertzainek. Horietako bat uneoro egon da bideoz grabatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun