Larunbat honetan, hilak 18, Nekazaritza Ekologiko eta Energia Berriztagarrien Azoka, Bio Getxo 2010, egingo dute Algortako Biotz Alai plazan. Aurtengoa bosgarren edizioa izango da. Getxoko Udalaren babesarekin eta BBKren laguntzarekin, Ekolur Bizkaiko Nekazaritza Ekologikoaren elkarteak antolatzen du urtero. Azoka 10:00etatik 15:00etara egongo da zabalik eta bio-elikadura edo produktu ekologikoen (ongarriak edo produktu kimikoak erabiltzen ez dituztenak ezta gai transgenikoak ere) 50 bat stand edukiko ditu. Bertara hurbiltzen direnek, besteak beste, barazkiak, gaztak, frutak, marmeladak, ogia, eztia, sagardoa, olioa, ardoa eta kontserbak aurkituko dituzte. Talo eta txorizoa ere dastatzeko aukera egongo da Bizkaiko ardoarekin zein sagardoarekin; horiek ere ekologikoak. Argazkian, azoka aurreko edizio batean / © Getxo.net
Horretaz gain, pertsona nagusiek zein haurrek hainbat tailerretan parte hartzeko aukera edukiko dute. Azkenik, Araba, Bizkaia eta Gipuzkoan energia berriztagarrien eta garapen jasangarriaren arloan lan egiten duten enpresak ezagutzera emateko asmoz, bio-eraikuntzari lotutako proiektuak gauzatzeko eta energia berriztagarriekin lantzeko dauden materialak ere erakutsiko dituzte. Azokaren xedea "egungo gobernu taldea aurrera eramaten ari den garapen jasangarriaren aldeko politiken artean kokatzen da, kasu honetan era arduratsuan kontsumitzearen eta jakiak ekoiztearen aldeko kultura sustatzeko", azaldu du Keltse Eiguren zinegotziak. Mota honetako produktu ekologikoak eta osasungarriak herritarrengana hurbildu nahi dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun