Urriaren 7an Palestinari buruzko solasaldia egingo dute Sopelako Kurtzio Kultur Etxean (Mendieta, 11). Jarduera arratsaldeko 19:00etan hasiko da eta Anis Hawari 1948ko errefuxiatu palestinarrak emango du hitzaldia. Horren bitartez, Bakea eta Duintasuna elkarteak eta Biladi kultura zentroak palestinar herriak bizi duen errealitatea gerturatu nahi diete Sopelako auzotarrei. Besteak beste, martxoaren 18tik apirilaren 9ra, Palestinari buruzko erakusketa hartu zuen Kurtzio Kultur Etxeak. 14 panelez osatutako mostra horretan autore ezberdinen argazkiak, mapak, testu laburrak eta Palestinako olerkarien bertsoak egon ziren ikusgai. Informazio gehiago proiektuaren webgunean aurki daiteke: www.palestinainfo.org. Argazkian, "Lotsaren harresia" Palestinan.
Bakea eta Duintasuna garapenerako lankidetza, elkartasuna eta giza eskubideen esparruan lan egiten duen elkarte independentea da, nazioarteko harreman justu eta solidarioagoak eraikitzeko asmoz gizartearen sentsibilizazioan eragina izan nahi duena mundu mailan garapen berdintsuago bat lortzeko. Bakea eta Duintasuna 1995an sortu zen sentsibilizazio esparruan lanean hasi zelarik; helburua gaur egun dagoen garapenaren ereduarekiko kontzientzia kritikoa sortzea zen, eredu hori injustua eta desberdintasunen eragile bezala aintzakotzat hartzeagatik. Biladi Palestinar Kultura Zentroa 2003an sortutako irabazi-asmorik gabeko elkartea da, herri palestinarra eta euskaldunaren arteko harreman kulturalak sustatzeko helburuarekin. “Biladi” izen arabiarra da eta bere esanahia “nire lurra”, Lurralde Okupatuetan eta errefuxiatuen kanpamenduetan sakabanatuta bizi diren 8 milioi palestinarren lurra, alegia. Elkarteak palestinarren errealitatea, bizitza, kultura, ohiturak eta tradizioak sustatu eta landu nahi ditu interesa duten erakunde eta pertsonengan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun