Bestalde, Europa Press albiste-agentziak filtratu duenez, atxilotu guztiak espetxeratzea eskatuko du Pedro Rubira fiskalak. Bere aburuz, atzemandakoei erakunde terroristan partaide izateko delitua zantzuz leporatzeko froga nahiko dira auzian.
Filtratutako Guardia Zibila eta Fiskaltzaren bertsio ofizialean, Ekineko ustezko ardura izatea leporatu diote Eneko Compains iruindarrari. Ugaitz Elizarani, Compainsekin, nazio zuzendaritzako lanak partekatzea egozten diote, pasa den urrian atxilotu zuten Aitor Elizaran ustezko ETAko politika arduradunaren anaia izateagatik. Filtrazioek ez dute zehazten zeintzuk diren Erika Bilbaori eta beste atxilotuei egokitutako ardurak.
Ekineko zuzendaritza osatzea egotzita, asteartean atxilotutako Erika Bilbao eta beste zortzi pertsonak galdekatzen hasi da Fernando Grande-Marlaska Auzitegi Nazionaleko epailea gaur goizean, EITB-k Iturri juridikoak aipatuz jakinarazi duenez. Rosa Iriarte, Urko Aierbe eta Ugaitz Elizaran Espainiako Auzitegi Nazionaleko ziegetan daude, 3. Instrukzio Epaitegitik igaro ostean. Erika Bilbao, Eneko Compains, Joxe Aldasoro, Sandra Barrenetxea, Egoitz Garmendia eta Aniaitz Ariznabarreta beste atxilotuei dagokienez, haietako hiru arratsaldean galdekatu behar omen dituzte eta beste hirurak bihar goizean pasatuko lirateke Grande-Marlaskaren aurretik. Bitartean komunikabideek ez dute zehaztu non dauden. Epaileak bihar du azken eguna galdeketak egin ahal izateko, orduan bukatuko baita atzemandakoak inkomunikatuta eta Guardia Zibilaren esku egoteko bost eguneko epe legala. Ildo horretan, asteazkenean egindako agerraldian, atxilotuen senideek "Guardia Zibilaren esku inkomunikatuta egoteak benetako tortura arrisku larria esan nahi" duela ohartarazi zuten. Horregatik, gaur ere mobilizazio bana egingo dute Erandion eta Leioan, 19:00etan metro geltokian eta 20:00etan Boulevardean, hurrenez hurren. Argazkian, Erika BIlbao Guardia Zibilaren eskuetan pasa den asteartean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun