Ostiralean Erandion hasi eta asteburuan zehar Uribe Kosta zeharkatu duen UK Martxa atzo bukatu zen Plentzian. Goizeko 9:30ean Sopelako udaletxeko plazan gazteria eta errepresioaren inguruko hitzaldia egin ostean, Plentziarako bidea hartu zuten neska-mutilek. Kostaldea zeharkatu eta, Barrikan, gudariei omenaldia egin zieten martxan ibilitako 50 bat lagunek. Ostean, bideari ekin zioten berriro eta, 13:30ak aldera, gazteak Plentziako hondartza aurreko pasealekura heldu ziren. Bertan, ekitaldi nagusia egin zuten. Horretan, "egun Euskal Herriak bizi duen egoera politikoaren garrantziaz" hitz egin zuten, baita gazteak horrekiko hartu behar duten "konpromisoaz" ere. Eskualdeko preso politikoak, eta bereziki, azkenengo sarekadan atxilotuak izan diren herritarrak gogoratu zituzten, baita 2009ko abenduan atzeman zuten Xabier de la Maza gorliztar gaztea ere. Argazkian, neska-mutilak ekitaldia egin zen tokira heldu berriak.
Arratsaldeko hiruretan, gosea ekidin nahian, bazkariaren momentua heldu zen. Guztira, 175 bat pertsona hurbildu ziren aipatu oturuntzara. Bazkaldu osteko "derrigorrezko" patxarana hartu eta gero, kontzertua eta erromeria izan zen 2010eko UK Martxa gogotsu eta animoso bukatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun