Atzo, igandea, amaitu zen ostiraletik Getxoko Andra Mari kiroldegian izandako Guaitorock jaialdia. Ugariak izan dira asteburuan zehar euren musika estiloak erakutsi dituzten taldeak, 20 banda hain zuzen ere. Jaialdia iraun duen hiru egunetako musika emanaldiak 18:00etan hasi dira eta 01:00ak arte iraun dute, nahiz eta hasiera batean beranduagora arte egin nahi zuten. Izan ere, hasiera batean, antolatzaileek 02:00etan bukatzea espero bazuten ere, Getxoko Udalak, "auzokideak kexatzeko beldurrez", ordu bat gutxiagoko baimena eman zuen. Horri jarraituz, ostiral eta larunbatean, Getxoko Udaltzaingoa ingurutik ibili zen ordutegia betetzen zela ziurtatzeko. Entzule kopuruari dagokionez, asteburu osoan zehar 350-400 pertsona inguru hurbildu direla jakinarazi diote UKBERRI.NETi Guaitorock jaialdiko antolatzaileek. Argazkian, kontzertuetako bat.
Asteburuko balorazioari dagokionez, egunik oparoena larunbata izan dela adierazi dute antolatzaileek. Okerrena, berriz, igandea. Izan ere, azken egunean, 20 bat pertsona gerturatu ziren bakarrik egun horretarako antolatuta zeuden ekitaldietarako, tartean perkusio tailerrak. Ostiralean, Udaltzaingoaren presentzia nabarmena izan zen. 00:30ean OST taldea jotzea aurreikusita zegoen, ordu erdiko emanaldia eskaintzeko; baina azkenean, atzerapenak zirela eta beranduago igo ziren eszenatokira. Udaltzaingoa behin eta berriz abisatzen ibili zen 01:00etarako dena bukatuta egon behar zela eta, ondorioz, Bermeoko taldeak ezin izan zuen bere osotasunean saioa bukatu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun