Landa-bideak garbitzen eta udal eraikinak berriztatzen ibili dira Erandioko 24 langabetu
Erandioko 24 langabetuk parte-hartu dute aurten tokiko Behargintzak sustatutako Auzolan egitasmoan. Martxotik irailera bitartean, landa-bideak garbitzen eta udal eraikinak berriztatzen ibili dira, zortzina lagunez osatutako hiru taldetan banatuta. Aitziber Oliban Enplegu eta Ekonomia Sustapen zinegotziak adierazi duenez, "helburua ez da kriston kontratua eskura dezatela. Lan egiteko ohitura eta gaitasunak sustatu nahi ditugu". Izan ere, Auzolan programan parte hartu duten 8 emakume eta 16 gizonetatik askok "ez dute inoiz ere lanik egin", Olibanek nabarmendu duenez. "Baztertuak izateko arriskuan egon dira, gehienak udal laguntzekin gainera", gaineratu du tokiko arduradunak. Bitartean, Joseba Goikouria alkate erandioztarrak 24ek "lan paregabea" egin dutela aipatu du. Besteak beste, Fano aldeko auzokideek helarazi diote udal agintariari euren esker ona aipatu lagunek egindako lanagatik. Gauzak horrela, landa-bideak garbitzen ibilitako bi taldeei ez ezik, udal eraikinak berriztatzen aritutakoei ere zorionak eman dizkie Goikouriak. Argazkian, Bekoa ikastetxea dago Erandioko Behargintza / © Behargintza.
Landa-bideen garbiketari dagokionez, ondoko lekuetan aritu dira: Kozkoetxetik hiru gurutzetara, kiroldegi atzeko zabalgunean, Fanon, metro ondoko zabalgunean, Altzagako Desanexio kalean, Erandioko kanposantuan, Martiartuko probalekuan, Fanotik Sondikara arteko mugan eta Akarlandan. Bestalde, udal eraikinak berriztatzen ibilitako taldea Erandioko Behargintzan eta Astrabuduako antzinako osasun etxean aritu da. Azken horretan baliteke ludoteka jartzea, Olibanen arabera. Horretaz gain, antzinako udal azoka margotu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun