Miliaren aurkezpen ekitaldian, Imanol Landa alkatea pozik agertu da (mp3), “finkatzen doan proba honen" ekitaldi berri bat egingo delako eta "Getxo atletismoaren erreferente egiten duelako”. Landak nabarmendu du, gainera, “atletismoarekin maila gorenean gozatzeko aukera bikaina ematen duela, herri barruko zirkuitua izanik, hurbiletik jarraitu ahal dugulako”. Itxartu Taldearen izenean, Rikardo Ansotegik gogoratu du kirol lasterketa honen helburua dela “batetik, berau finkatzea; eta bestetik, atletismoaren praktika sustatzea, udalerria bultzatu eta herritar guztiei kirol ikuskizun bat eskaintzearekin batera”. Lasterketan parte hartuko dutenek 1.600 metro inguruko distantzia bete beharko dute, 390 bat metroko zirkuituari lau itzuli eta erdi emanez. Algortako Telletxe kalean izango dira irteera eta helmuga. Probaren zehaztasun teknikoak Getxo Atletismo Taldeko arduradun nagusi Dimas Ramosek eskaini ditu. Honek, ekimenaren maila aparta azpimarratu du: “bertan parte hartuko duten korrikalariak maila handikoak dira”.
Izen-ematea
Lasterketarako izen-ematea doakoa da eta interesatuek info[abildua]itxartu.org helbide elektronikoan zein Gaztañaga Kirolak eta Kantxa Kirol Moda dendetan egin ahal izango dute; hilaren 24ra arte, edota irteeran bertan proba bakoitza abiatu baino ordu erdi lehenago.
Besteak beste, Joko Olinpiarretan hiru aldiz parte hartu eta 1.500 metrotan garai guztietako Espainiako bigarren markarik onena lortu duen Reyes Estevez atletak parte hartuko du larunbat honetan, irailak 25, Getxoko Miliaren laugarren edizioan. Getxo Atletismo Taldeak eta Itxartu Taldeak antolatuta, Algortako erdigunean egingo dute korrika, 11:45etik aurrera. Bestalde, Getxoko Udalak 6.000 euroko diru-laguntza eman du. Lasterketa irekia da eta gizonezko zein emakumezkoen maila ezberdinak izango dira, txikien eta benjaminen mailetatik elite mailara non Reyes Estevezekin batera beste 16 atleta profesional arituko diren: Antonio Reina, Antonio Jimenez Pentinel, Isabel Macias, Reda Ait Douida, Zacarie Mazzouzi, Irene Pelayo eta Khadija Rahmouni, besteak beste. Araba, Bizkaia eta Gipuzkoako elite mailako ordezkariak, bestalde, Iñigo de la Granja eta Iñigo Artabe izango dira gizonezkoetan; eta Belit Solar, Raquel Llama seta Leire Medina, emakumezkoetan. Argazkian, Getxoko IV. Miliaren aurkezpena gaur goizean / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun