Ikoitz Arrese IAko bozeramailearen arabera, ikasleen egoera ez da hobetu: "Administraziotatik datozkigun erasoak etengabeak dira". Euskal Herriko lurralde zatituen araberako balorazioan, Ipar Euskal Herrian euskal departamenturik ez izateak ikasleei dakarzkien gabeziak salatu zituen. Nafarroa Garaiari dagokionez Gobernua "betiko bide espainolistan" jarraitzen duela esanez laburtu zuen egoera. Araba, Bizkai eta Gipuzkoako Gobernu berriak sostengatutako Hiru eleko hezkuntz eredua "inposaketatzat" eta "erasotzat" jo zuen, ikasleen kontrako errepresioarekin batera.
Bestalde, gogor kritikatu zuten Euskal Herriko unibertsitateetan indarrean jarri duten Bolognako prozesua: "Unibertsitate eredu arrotz, antidemokratiko eta merkantilistak haziz doaz Euskal Herrian", salatu zuten. Gainera, Bologna ezartzeko prozesua "ikasleon hitzari entzungor eginez" gauzatu dela salatu zuen Arresek.
Ikasleen Nazioarteko Eguna azaroaren 17an bada ere, aurten azaroaren 6a aukeratu du Ikasle Abertzaleak erakundeak estudianteen eskubideak aldarrikatzeko. Atzo taldeak egindako ikasturte berriko aurkezpenean iragarri zuenez, "Ikasleoi erasorik ez, Hezkuntza Sistema Nazionala" izango du lelotzat aldarrikapen eta ospakizun egunak. Hezkuntza sistema eskatzearekin batera, "Curriculum arrotzak" eta "hezkuntza patriarkala" ukatuko dituzte nazio manifestazioa dela medio. Baina, mobilizazioaz gain, Ikasle Egun "berezia" nahi dute burutu, egun osoko jai erraldoia eginez. Bitartean, jai arrotzak ez ospatzera eta herri eskoletan parte hartzera deitu zuten, urriaren 12a eta abenduaren 6a buruan. Era berean, parekidetasuna eta hezkidetza bultzatuz, urriaren 25ean, Emakumeenganako Indarkeriaren Aurkako Egunean, eta martxoaren 8an mobilizatzeko deia egingo du IAk. Argazkian, 2008an Erandion burutu zuten Ikasle Eguneko asanblada.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun