Gaur, asteazkena, beteko dira 19 egun Mikel Karrera euskal preso politiko iruindarrak gose greba abiatu zuenetik. Poitierseko (Frantzia) espetxean baraualdia egiten ari ziren beste hiru lagunek, tartean Saioa Sanchez berangoztarrak, bertan behera utzi dute protesta, Amnistiaren Aldeko Mugimenduak (AAM) zabaldu duenez. "Maite Aranaldek eta Saioa Sanchezek irailaren 9an abiatu zuten gose greba puntuala izan zen; bi eguneko baraualdia burutu zuten. Aldiz, espetxe berdinean borrokan dauden Mikel Karrera eta Joseba Fernandez kideekin elkartasunez borrokan segitzen dute mitard-ean egonez, hau da zigor ziegak okupatuz", azaldu du errepresioaren kontrako erakundeak. Bitartean, Fernandezek pasa den ostegunean utzi zuen gose greba. Bestalde, espetxeko zuzendariak prentsari zabalduko mezua "gezurtzat" jo du AMAk. "Ez, preso guziek ez dute tratamendu berdina jasotzen; ez, ez dira errespetuarekin tratatuak. Bai, asteburuetan bisitak izatea posible da, bereziki 950 kilometro egin beharra duten familientzat. Gainera, euskal preso politikoei tentsioak, bortizkeria eta tratu umiliagarriak inposatzen zaizkie espetxezain batzuengandik", salatu dutenez. Argazkian, herritar bat Saioa Sanchezen irudiari heltzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun