Ostegun honetan, irailak 23, Bilboko Ingeniaritza Goi Eskola Teknikoko areto nagusian bilera egingo du EHUko Klaustroak. Hitzordua 9:30ean jarri dute, lehenengo deialdian; eta 10:00etan, bigarrenean. Aipatu batzarrean gai bakarra aztertuko dute: Euskal Herriko Unibertsitateko estatutu berriak onartzea. Horiek unibertsitateak onartu ahal duen arau gorena dira eta barne antolakuntza arautzen dute, tokiko iturriek aipatu dutenez. EHUko oraingo estatutuak 2003an onartu ziren. Baina, Unibertsitateen Lege Organikoa eta Euskal Unibertsitate Sistemaren Legea geroago indarrean sartu zirenez, arautze berria "premiazkoa" da, EHUko arduradunen arabera. Bihar Klaustroa bozkatuko duen proiektua Estatutuak Garatzeko Batzordeak egin du. Batzorde hori Klaustroak berak aukeratu zuen. Argazkian, Leioa eta Erandioko campuseko ikastegietako bat.
Proiektua ekainean aurkeztu zen eta ondoren, zuzenketak aurkezteko epea ireki zen. Guztira, 167 zuzenketa aurkeztu ziren, horietariko gehienak osorik edo zati batean gehitu dira, beste batzuk errefusatu dira eta zazpi Klaustroan bertan eztabaidatu eta bozkatuko dira. Azkenik, estatutuen testu osoaren botazioa egingo da. Testu hori onartu egingo da, baldin eta gehiengo osoa lortzen badu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun