“Gogoratu, zure eskubideak defendatu eta zabaldu" lelopean, Haurren Eguna izenez ere ezaguna den Osasun Jaia ospatuko dute larunbat honetan, irailak 25, Erandioko Akarlanda parkean (Unbe). Gehienbat udalerriko haur eta gazteei zuzenduta dago, 17 urte bitarteko erandioztarrei, hain zuzen. Aurreko urteetan bezalaxe, aurtengo ekitaldian ere garrantzi berezia emango diete umeen eskubideei. Ekitaldian, "bizimodu osasuntsua eta ingurugiroaren babesa sustatzeko eta alkoholdun edarien zein tabakoaren kontsumoa prebenitzeko xedea duten jarduera jolasgarri eta animaziozkoak" edukiko dituzte neska-mutilek, udal iturriek zehaztu dutenez. Horrenbestez, 11:00etatik 14:00etara luzatuko da jaia. Akarlandara joateko, ohiko herri barruko autobusaz gain, unitate berezi bat doan ibiliko da. Argazkian, gaztelu puzgarriak aurreko Osasun Jai batean, Akarlandan / © Erandio.net.
Jardueren artean, umeentzako jolas eta tailerrak, gaztelu puzgarriak eta globo aerostatikoa izango dira. Horretaz gain, 11:30etik aurrera Akarlandan barrena ibiliko dira txistulariak. Eguerdiko 12etan, berriz, Erandioko Udal Musika Bandaren emanaldia eta udalerriko dantza taldeen erakustaldiak izango dira. Garraioari dagokionez, Altzagatik Akarlandara heltzeko, 9:00etatik aurrera egongo dira autobusak. Horrenbestez, orduro izango da Unberako bidaia, 12:00ak arte, metro geltokitik abiatuta. Bueltatzeko, berriz, Akarlandako Gurutze Gorriko postuan hartu ahal izango da autobusa, orduro, 13:00etatik 16:00etara. Astrabuduan (Mezo kaleko autobus geralekuan) eta Erandio Landako Andra Mari elizan ere hartuko dituzte bidaiariak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun