Eskubideen aldeko eta debekuen kontrako manifestazioa deitu dute urriaren 2rako Bilbon
Gizarte eta politika munduko aurpegi ezagunak biltzen duen herritar talde anitz batek manifestazioa deitu du urriaren 2rako, Bilbon. Hitzordua 17:00etan jarri dute Aita Donostia plazan. Horren bidez, eskubide humano, zibil eta politikoen aldeko eta manifestazio debekuen aurkako aldarriak zabaldu nahi dituzte. "Inposizioaren eta indarkeriaren" aurka ere agertuko dira. Hauxe da leloa osorik: "Ez manifestazioen debekuari. Inongo inposiziorik ez, inongo indarkeriarik ez. Bai giza eskubideei, eskubide zibilei eta politikoei". Gaur iragarri dute ekimena, Bizkaiko hiriburuan. "Berriki jazo diren manifestazioen debekuengatik kezkatuta gauden pertsona talde bat gara. Horregatik, manifestazio bat deitzea erabaki dugu", adierazi dutenez. Eurak ezker abertzaleko kideak ez direla esan dute. Argazkian, besteak beste, Paul Rios Lokarriko koordinatzaile algortarra dago deitzaileen artean / cc-by Paul Rios.
Gaur jakinaraziko diote deia Eusko Jaurlaritzako Herrizaingo Sailari. Debekurik balego, "estatu totalitarioan bizi" garela egiaztatuko da, adierazi dutenez. Gaurtik aurrera harremanetan jarriko dira "alderdi politiko guztiekin", sindikatuekin eta gizarte eragileekin biltzen hasiko direla adierazi dute, mobilizazioaren helburua helarazi eta atxikimendua lortzeko. Deitzaileen artean dira Txaro Arteaga Emakundeko presidente ohia, Gabriel Mariscal Bizkaiko abokatuen dekano ohia, Ramon Zallo EHUko irakaslea, Pedro Ibarra EHUko irakasle izandakoa, Paul Rios Lokarriko koordinatzailea, Maixux Rekalde Elkarriko zuzendaritzakide ohia, Felix Cañada abokatua, Jose Luis Longarte Gogoa elkarteko kidea, Natxo Isuzkiza, Carmen Moreno eta Alfonso Dubois irakaslea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun