Bizimeta bizikleta mailegu zerbitzuak urtebete egin du. Aipatu zerbitzua Uribe Kostako Mankomunitatea osatzen duten zazpi udalerrietan dago erabilgarri. Arduradunek azaldu dutenez, epe horretan, 1.300 pertsonek baino gehiagok eman dute izena aipatu zerbitzuan, 36 eta 50 urte bitartekoak batez ere. Atzo goizean, urtebetea ospatzeko prentsaurrekoa egin zuten Sopelako Kurtzio Kultur Etxean. Bertan, Imanol Garai tokiko alkatea, Juan Olea Uribe Kostako Zerbitzu Mankomunitateko presidentea, Maria Uribe Bizkaiko Foru Aldundiko Ingurumen zuzendaria, Antton Goikoetxea Uribe Kostako Zerbitzu Mankomunitateko Ingurumen Arloko arduraduna eta Javier Mariño rezikletako Ingurumen Zerbitzuetako zuzendaria egon ziren. Azaldu zutenez, erabiltzaileen eskari nagusiei erantzunez indartu egin dute zerbitzua, bizikleta eta bizipuntuen kopurua %40a handituz eta adimendun bideo-zaintza integratua ezarriz. Horrek Bizkaiko Foru Aldundiko Ingurumen Sailaren eta Eusko Jaurlaritzaren laguntza ekonomikoak jaso ditu: 162.500 euro eta 79.957 euro, hurrenez hurren. Bestalde, Nafarroako Kutxak (CAN), gizabidezko banka sistemaren bitartez, 6.000 euro ingururen ekarpena egin du. Argazkian, atzoko ekitaldia / © Joseba Zubiaur - Sopelako Udala.
Bizimetako arduradunek jakinarazi dutenez, lehen urte honetan izandako 10.825 erabileretan, bizikletek 33.000 kilometro inguru egin dituzte, eta horrek 5,2 tona CO2 gutxiago isurtzea ekarri du. Bestalde, duela gutxi jarritako bizikleta elektrikoek arrakasta handia eduki dute. Erabileren %22a 50 urtetik gorakoek egin dute. Gainera, jasotako eskari handia dela eta, bizikleta mota horren eskaintza hirukoiztu egin dute. Mankomunitateko 18 bizipuntuetan dauden 163 txirrinduetatik 70 elektrikoak dira. Hasiera batean 20 bizikleta elektriko baino ez zeuden.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun