Interneti buruzko aholkuak aurkituko dituzte gurasoek "Seme-alabak" aldizkariaren ale berrian
Getxoko Gurasoen Eskolak Udalarekin elkarlanean egindako "Seme-alabak" aldizkariaren iraileko alea Interneten erabilerari buruzkoa da. Hain zuzen ere, Internetek eskaintzen dituen baliabide batzuk (uneko mezulariak, gizarte sareak eta blogak) deskribatzen ditu argitalpenak, "haurrak eta nerabeak babestu beharra guraso ugariren kezka baita gaur egun", udal iturriek aipatu dutenez. Aita-amei zuzenduta, aholku erabilgarriak eskaintzen ditu aldizkariak, tartean gurasoen eta seme-alaben arteko elkarrizketa bultzatzekoak. Horretaz gain, informazio konfidentziala ematea saihestu eta itxuraren aurrean mesfidatiak izatera bideratu nahi ditu internautak. Gainera, adingabeentzako gomendioen artean, loturak ez sakatzea, artxibo ezezagunak ez irekitzea eta pertsona ezezagunekin ez hitz egitea ere aholkatzen dute tokiko arduradunek. Azkenik, ziber-erasoen berri ematen du "Seme-alabak" aldizkariaren iraileko aleak; baita gaiari buruzko liburu bat eta eduki egokiak dituzten hainbat webgune (www.chaval.es, www.pantallasamigas.es) gomendatu ere. Argazkia: © Getxo.net.
"Seme-alabak" argitalpenak Gurasoen Eskolaren heziketa jardueren osagarri izan nahi du, Getxoko familien arteko baliabide bezala, dinamizatze eta partaidetza bultzatze aldera. Argitalpena urtean birritan kaleratzen da (www.getxo.net web gunean ere ikus daiteke, pdf-an); 6.700 ale euskaraz eta espainolez, eta izaera hezitzailea du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun