Aldapabarrena kalean dago gaztegune berria, skate parkearen ondoan, eta Pinosoloko zonaldean; hau da, igerileku irekien parean eta etorkizun batean kiroldegi berriak beteko duen lurzoruaren alboan. Gaztelekuaren banaketa egiterakoan ondokoa izan dute kontutan: ekintza zaratatsuak eta lasaiagoak egiten diren guneak banatzea. Horretaz gain, aretoa zatika ireki daiteke, erabilera eta ordutegien arabera. Zehazki, besteengandik bereizi daitekeen gunea “zaratatsua” da. Erabilera anitzeko gela, elkarteen bilerak egiteko gela eta nagusientzako gela hartzen ditu horrek. Udal arduradunek azaldu dutenez, "esfortzu berezia" egin da isolamendu akustikoan lokalaren goiko aldean bizi diren leioaztarrei eragozpenik ez sortzeko.
Gazteen iritzia kontutan
Bestalde, Gaztegunea diseinatzerakoan "Leioako gazteen iritzia oso kontutan izan dutela" diote tokiko agintariek, "eurek izango direlako erabiltzaile bakarrak". Horretarako hainbat galdeketa eta informazio kanpaina egin izan dira. "Laburbilduz, Aterpe Leioa Gaztegunea jolaserako eta elkartzeko gunea da; lagunak egin, lehiaketetan, ikastaroetan zein tailerretan parte hartu, eta aisialdiko ekintza pilo bat burutuz gain ikasteko aukera ere ematen duena", amaitu dutenez.
Gaurtik hasita, eta asteburu osoan zehar, ate irekien jardunaldiak izango dira zabaldu berri duten Aterpe Leioa Gaztegunean. Bereziki, 14 eta 35 urte bitarteko gazteei zuzendutako lokal berria erabilera anitzekoa izango da; gazteei zuzendutako informazioa biltzeko, edota jolastu eta ikasteko toki bat da, udal iturriek zehaztu dutenez. Guztira, 517 metro koadro ditu: bertan 50 pertsonentzako ikasteko gela bat, erabilera anitzeko gela, nagusientzako egongela bat eta txikientzako beste bat, informatika gela, elkarteentzako batzar gela, bulegoak, sukaldea eta jantokia duen txokoa, administrazio gunea, komunak eta artxibategiak daude. Horretaz gain, "azken urte hauetan emaitza baikorrak" eman dituen Gazte Informazio Zerbitzua, Aterpe, ere bertan kokatzen da. Horrela, tokiko arduradunen arabera, auzoetako kulturguneekin batera, Gaztegunea "Leioako kultura azpiegituren erreferentzia" bihurtuko da, herriko gazteen artean. "Aipatzekoa da ere, gaztegune honetan kokatzen den sexu aholkularitza zerbitzua, Leihosex", gaineratu dutenez. Profesionalez osatutako zerbitzu horrek sexu gaietan neska-mutilek dituzten kezkak eta galderak erantzuten ditu. Leioako gazteriarentzat zuzendutako azpiegitura berriaren egokitzapen obraek eta ekipamendu guztiak ia 700.000 euroko kostua izan dute. Argazkian, Algortak ere badauka udal gaztelekua / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun