Eskubide zibil eta politikoen aldeko aldarriak jai itxura hartuko du igande honetan, irailak 26, Altsasun egingo den 2010eko Bategin Egunean. Uribe Kosta eta Erandiotik hara joateko hainbat autobus jarri dute, izen-ematea ohiko lekuetan egin beharko dela, bihar askoz jota. Igandean, honako herri eta orduetan aterako dira autobusak: Sopelatik 8:45ean, Algortatik 9:15ean eta Leioatik 9:30ean. Aurtengo Bategin Egunak Udalbiltzaren aurkako epaiketan auzipetuta daudenei babesa eta laguntza ematea izango du helburu nagusia. Eguraldiak eragozten ez badu behintzat, Altsasu eta Urdiain arteko San Pedro ermitako landetan egingo da jaia. Ekitaldiek 10:30ean hasi eta arratsaldera arte iraungo dute. Besteak beste, pailazoak, bertsolariak edota Esne Beltza eta Izargi taldeen kontzertuak izango dira. Paella erraldoia, babarrun jana, sardinak eta taloak egongo dira aukeran bazkalorduan. Argazkian, uztailaren 10ean elkartasuna adierazi zieten Algortan Udalbiltzako auzipetuei.
Igandeko jaia goizean goiz hasiko da. Hala, 10:30eko aurkezpenaren ondoren, Pirritx eta Porrotxen ikuskizunaren txanda izango da. Eguerdian bertsolariak izango dira, eta, 13.00ean, ekitaldi politikoa. Arratsalde partean, berriz, Esne Beltza eta Izargi taldeen kontzertuak (16:00) izango dira agertoki handian. Bigarren eszenategi batean, bestalde, Orduñako joteroak (12:15) ariko dira eguerdian eta Sunbillako kantariak (16:00) arratsaldean. Basoan barrena, gainera, Kukubiltxo taldea (17:00), trikitilariak edo batukadak ariko dira giroa alaituz. Jan-edanerako aukerarik ere ez da faltako. Hala, bazkalorduan (14:30) 700 lagunentzako paella eta beste 500entzako babarrun-jana izango dira. Castroko sardinak, Lazkaoko taloak, bokatak edo pintxoak ere izango dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun