Estatutu berriek jasotzen dituzten berrikuntzen artean, honakoak aipa daitezke:
- Unibertsitateko Klaustroaren eta Gobernu Kontseiluaren osaketa berria. Klaustroan, unibertsitateko kideen ordezkaritza organo gorenean, klaustrokideen kopurua 303tik 243ra murriztuko da; kide horietariko hiruk, errektoreak, idazkariak eta gerenteak, kargudun kideak izaten jarraituko dute. Gobernu Kontseilua, unibertsitateko politika orokorraren jarraibideak eta jarraibideok aplikatzeko prozedurak ezarri eta garatzen dituena, handituko da, lehen ordezkaturik ez zeuden talde eta egiturak sartu ahal izateko. Guztira 47 kide izango ditu.
- Errektorearen hautaketan, aurreko araudian, hautagai bakarra balego, hautagai bakar hori errektore irtengo zen baldin eta emandako baliozko botoetatik kontrako baino aldeko boto gehiago biltzen bazituen. Oraingoan ezin izango zaio kontrako botoa eman hautagaiari, boto zuriak edo aldekoak soilik izango dira posible. Errektore irtengo da, baliozko botoetatik aldekoak heren bat baino gehiago badira.
- Estatutuak aldatzea erraztu da, gehiengoak kalkulatuko dira etorri diren kideen eta ez, orain arte bezala, klaustrokide guztien arabera.
- Estatutuen beste berrikuntza batzuk hauek dira: unibertsitateko kide guztiei dagozkien eskubide eta betebehar komunak sartzen dituzte; ikasleen ordezkaritza organoak gehiago aitortu eta ikasleen araudi bat aurreikusten dute; irakasle eta ikertzaile figura berriak arautzen dituzte; Langile Publikoaren Oinarrizko Estatutuak Administrazio eta Zerbitzuetako langileengan duen eragina jasotzen dute. Halaber, Aldezlearen, hau da, EHUko arartekoaren arautzea aldatu dute hautaketa errazteko, behar duen adostasun zabala alde batera utzi gabe; EHUren nazioarteko hedakuntzari arreta berezia eskaintzen diote; etorkizunean sor daitezkeen doktorego eskolak aurreikusten dituzte eta pertsona bakarreko organoak irakasle eta ikertzaile iraunkorren esku egon daitezkeela eta ez, orain arte bezala, katedradun edo unibertsitateko titularren esku ezartzen dute.
EHUko Klaustroak unibertsitateko estatutu berriak onartu ditu gaur, hilaren 23an. Horiek unibertsitateak onartu ahal duen arau gorena dira eta barne antolakuntza arautzen dute, tokiko iturriek aipatu dutenez. Estatutu berriak onartzeko gehiengo osoa behar zuten, eta hala gertatu da. 283 lagunek osatzen dute Klaustroa. Horietatik 175ek alde bozkatu dute, 26k kontra eta 11 zuri. Estatutuen proiektua ekainean aurkeztu zen eta ondoren, zuzenketak aurkezteko epea ireki zen. Guztira, 167 zuzenketa aurkeztu ziren, horietariko gehienak osorik edo zati batean gehitu dira, beste batzuk errefusatu dira eta zazpi gaur eztabaidatu eta bozkatu dira. Bat ere ez du onartu Klaustroak. Argazkian, Iñaki Goirizelaia EHUko errektorea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun