Bestalde, Eusko Jaurlaritzaren Herrizaingo Sailak Europa Press albiste agentzia espainolari emandako bertsio ofizialaren arabera, gazteak "poliziei gainera etorri zaizkie" horiek euskal preso politikoen aldeko kartelak kentzera joan direnean.
Berri agentziaren arabera, 12etan agertu dira ertzainak Sakoneta kiroldegian. Kanpoaldean zeuden afixak kentzera joan direnean, "poliziei oldartu zaizkie" bi gizonezkoak. Ondorioz, atxilotu eta polizia egoitzaren batera eraman dituzte. Ertzainek kartelak kendu dituzte.
Ertzaintzak 33 eta 29 urteko gizon bana atxilotu du Leioan, "agintaritzaren kontrako atentatu delitua" egotzita. Atxiloketaren lekukoek UKBERRI.NETi adierazi diotenez, gertaerak goizeko 12 eta 12:30ak artean jazo dira, Sakoneta polikiroldegi aurrean, Sabino Arana kalean. Gazteak Erika Bilbaoren atxiloketa eta jasandako torturak iragartzen zituen panelak zeuden jartzen, Ertzaintza patruila bat "oso oldartuta" hurbildu zaizkie. Inguruan zeuden bost pertsona identifikatu eta aipatu gazteak atxilo hartu dituzte, "tortura salaketa faltsuak" eta "autoritateari atentatua" egin dituztela argudiatuz. Alabaina, lekukoen arabera polizi horiek zein geroago heldu direnak izan dira behin eta berriro oldartu direnak. Gazteen aurka hasieran eta gazteak atxilotzeagatik kritikatu dituzten auzokideen aurka ondoren. Oraingoz, atxilotuak Ertzain-etxeren batean daude. Bitartean, arratsaldeko 8etan torturaren aurkako manifestazioa deituta dago Leioako Boulevardean. Argazkian, panelean agertzen zen irudietako bat / cc-by-sa Askatu.org.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun