Ertzaintzak bortizki erasotu ditu atxilotuak kalean zeudela, polikiroldegi aurrean, panfletoak banatzen eta argazki erakusketa jartzen. Erakusketa hau aurreko astean ere kalean egon da, hilaren 14an izandako sarekadaren berri emanez, atxilotuek inkomunikazioan Guardia Zibilaren eskuetan jasandako torturak salatuz
Hala da, beste behin ere Herrizaingo sailak eta Ertzaintzak gezurra esan du. Ez da polizia-agenterik erasotu eta eurak ez zeuden presoen argazkiak kentzen. Jokaera honekin, Ezker Abertzaleko jendea beldurtu nahi dute eta torturaren, errepresioaren eta inkomunikazioaren inguruko salaketa kaleetatik kendu.
Pasa den astean leioaztarrok izan ziren 9 euskal herritarren aurka egindako erantzuna paregabea izan zen. Eta gaurkoa izan da Ertzaintzaren mendeku partikularra.
Ertzaintzaren jokaera hauek argi eta garbi erakusten digute Ezker Abertzaleak hartutako bidea egokia dela. Garbi dagoena da garaian garaiko txotxongiloak ez gaituela bide honetatik aterako, Ares jauna!
Gezurrez, muntaiaz eta errepresioz nazkatuta gaude!
Errepresioa ez da bidea!
Leioako ezker abertzaleak atzo, ostirala, zabaldutako oharra.
Ares eta Lopez jaunen Ertzaintzak joan den hilaren 14an Guardia Zibilak egindako sarekadan jokatutako paperarekin pozik ez, eta nagusia ez gutxiesteko, gaur, hilak 24, bere sarekada propioa egitea erabaki du Leioako bizilagun bi atxilotuz. Eusko Jaurlaritzaren Herrizaingo Sailak plazaratutako prentsa oharrak esan duenari aurre eginez, hain zuzen ere (hainbat hedabidetan eta "El orreo Español" bezalako sasi panfletoetan oihartzuna izan duena) benetan erasotuak, eta Ertzaintzak erasotuak, atxilotutako bizilagunak izan dira. Gertakari hauek guztiak, eguerdiko 12etan bertan zeuden leioaztarrek berretsi ditzakete (asko izan dira gainera). Leioaztar hauek atxiloketaren eta bertan jasandako irain eta mehatxuen lekuko izan dira. Argazkian, atzo arratsaldean torturaren kontrako manifestazioa eragotzi zuen Leioan Ertzaintzak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun