Urritik maiatzera arte, astero ordu batez, bertsolaritzako irakasle bat joango da gelara. Hamabi sekuentzia didaktiko berritan banatutako bertso liburua eskuartean, euskara, kultura, musika eta trebetasun pertsonal eta sozialak (jendaurrekotasuna, autoestimua, elkarkidetza...) landuko dituzte ikasleek. Aurten, gainera, bi urterik behin ospatzen den Bizkaiko Txapelketaren jarraipena egingo dute gelan bertan.
Jarduera osagarriak
Klaseko eguneroko lanaz gain, hainbat jarduera osagarri ere izango dituzte ikasleek ikasturtean zehar. Batetik, bertso saioak antolatuko dituzte, bertsolariekin bertatik bertara egonik eta beraien lana aurrez aurre ikusita, ikasleen bertsotarako motibazioa areagotzen baita. Bestetik, irrati saioa prestatuko dute ikasleek. Bizkaia Irratiarekin lankidetzan "Zortziko Txikia" irrati saioa grabatuko dute, astero astero, azaroan hasi eta maiatzera bitartean. Aste bakoitzean ikastetxe batek parte hartuko du, gelan egindako lana uhinen bidez zabalduz. Bertso Kantaldiak ere antolatuko dituzte, gitarra jole baten laguntzarekin, ikasturte hasieratik ikasitako bertso eta kantak abesteko eta kanta-zaletasuna zabaltzeko asmoz. Eta azkenik, "Bilbertsoak" izeneko bilduma osatuko dute. Ikasturte osoko lanaren erakusleiho txikia izango da hori, ikastetxe guztietan gelaz gela batutako lanekin argitaratzen den liburuxka.
Erandioko Udalarekin batera, 2010/2011 ikasturterako "Gu ere bertsotan" egitasmoa martxan jarriko du udalerri erandioztarreko lau ikastetxetan, Bizkaiko Bertsozale Elkarteak. Hurrenez hurren, Altzaga ikastolan, Goikolanda herri ikastetxean, Ignacio Aldekoa herri ikastetxean eta Jado Compasion ikastetxean emango dituzte eskolak. Antolatzaileak jakinarazi dutenez, "urteetako lanak emandako esperientzia lagun, ahozko komunikazio gaitasuna sormenaren bidez lantzea eta hobetzea du helburu egitasmoak, ikasleen parte hartzea bultzatuz". Guztira, 125 ikaslek baino gehiagok izango dute hitzekin eta hizkuntzarekin jolasteko aukera, bertsolaritzaren bidez; baita euskarri digitalen laguntzarekin ere. Horrela, bertsolaritzak "ahozkotasunari egiten dizkion ekarpenak bermatuko dira; azken hamarkadetan irakaskuntzaren erronka nagusi bihurtu den horri erantzunez". Argazkian, ALBEk antolatu ohi duen Bertsolari Gaztetxoen Eguna / © ALBE.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun