Urriaren 1era arte dago Sopelako aisialdi begirale ikastaroan izena emateko aukera

Sopelako Gazte Bulegoak 18 urtetik gorakoentzako aisialdirako begirale ikastaroa egingo du urritik 2011ko abendura arteko asteburuetan. Horren iraupena 350 ordukoa izango da. Arlo teorikoa Kurtzio Kultur Etxean emango dute. Arlo praktikoa, berriz, aterpetxean. Ordutegiari dagokionez, larunbatetan, 10:00etatik 14:00etara eta 16:00etatik 20:00etara izango dira eskolak; eta igandetan, goizez bakarrik. Agiria lortu ahal izateko bi arloak gainditu beharko dira. Gainera, antolatzaileek jakinarazi dutenez, "ikastarora joatea eta parte hartzea ere kontutan hartuko da". Aurrez izen-emateko epea urriaren 1era arte egongo da zabalik, Sopelako Gazte Bulegoan (Mendieta 11, Kurtzio Kultur Etxea). Prezioa 250 eurokoa izango da. Ikastaroa trinkoa izango da eta euskaraz egingo dute. Argazkian, ume batzuk magia saio batean adi-adi.