Gabi Basañezen atxiloketari dagokionez, "normaltasunez edo" suertatu dela aipatu dute AAMko kideek; "ez baita indarkeriarik egon". Bitartean, gaurko polizia operazioa "Euskal Herriak egun bizi duen prozesuaren aurkako beste eraso bat" dela salatu dute errepresioaren kontrako mugimenduko ordezkariek; baita Askapeneko kide batek (mp3), manifestazioaren bukaeran espainolez irakurritako adierazpenean. Hartara, "kalean tinko eustera" eta, bide horretan, larunbat honetan, urriak 2, Bilbon izango den manifestaziora joateko deia luzatu dute. Aipatu martxa gizarte eta politika munduko aurpegi ezagunak biltzen duen herritar talde anitz batek deitu zuen, joan den asteazkenean. "Ez manifestazioen debekuari. Inongo inposiziorik ez, inongo indarkeriarik ez. Bai giza eskubideei, eskubide zibilei eta politikoei" lelopean, 17:00etan abiatuko da Aita Donostia plazatik.
Gaurko manifestazioari dagokionez, Ertzaintzaren Brigada Higikorreko bi furgoneta agertu dira, protesta hasi baino lehen. Telletxeko autobus geltokian izan dira uneoro. Hala ere, ez da gorabeherarik egon, udaltzainek zabaldu baitiote bidea martxari.
Ikusi gaurko manifestazioaren argazkiak:
Gaur iluntzean, eskualde osotik heldutako 300 gizon-emakume inguruk egin dute manifestazioa Algortako kaleetan zehar, Gabi Basañezen eta Askapenaren kontrako polizia operazioaren baitan atxilotutako gainontzeko sei euskal herritarren askatasuna aldarrikatzeko asmoz. Hain zuzen, martxa bukatu bezain laster, algortarraren emaztearen ahotik jakin dute Amnistiaren Aldeko Mugimenduko (AAM) kideek Pablo Ruz epaileak konfiantzazko medikua izateko aukera eman diela atxilotuei. Orduantxe deitu diote Madrildik Basañezen andreari. Dena den, tentuz ibiltzeko deia luzatu du AAMk (mp3). Izan ere, torturak saihesteko protokoloa aplikatu arren, "aurreko hainbat kasuetan gertatu izan direla" salatu du errepresioaren kontrako mugimenduak. Inkomunikazio egoera iraun bitartean, egunero egingo dute manifestazioa Algortan; 20:00etan, Telletxetik abiatuta. Argazkian, gaurko manifestazioa Algortan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun