Hamar orduko batzarraren ostean, egungo lan-hitzarmena 2011ko abenduaren 31ra arte luzatzea onartu zuen atzo Metro Bilbaoko zuzendaritzak. Halaber, "gerrikoa estutzeko" asmoz, zuzendaritzako kideen soldata %5 murriztuko du garraio enpresak. Izan ere, lansarietan gastu publikoari eusteko horrenbesteko murrizketa egitea agintzen du Eusko Jaurlaritzak ekainean onartutako legeak. Trukean, "lantaldea izozteri" oniritzia eman ei zioten beharginek ordezkariek; trenak Arizera (Basauri) heldu arte, langile kopuru berberarekin jarraitzea, alegia. Hortaz, kanporatutako aldi baterako lau langileak ez dituzte oraindik berriro hartuko. Lan-poltsa osatuko dute eta sindikatuek eurek erabakiko omen dute, txandaka bada ere, horiek noiz lan egingo duten. Horiek langabezian ahalik eta denbora gutxien ematea da asmoa.
Hala ere, ELA, CIM, CCOO, UGT, LAB eta ESK sindikatuek euren bazkideekin eztabaidatu beharko dute orain hitzarmenari baietza ematen dioten ala ez. Azken erantzuna ostiralean, urriak 1, 11:00ak baino lehen eman beharko dute.
Datorren astelehenerako, urriak 4, aurreikusita zegoen lau orduko lanuztea (goizeko 8etatik 10etara eta 18:00etatik 20:00etara) bertan behera uztea erabaki zuen atzo EuskoTreneko enpresa batzordeak, "El Correo Español" egunkariak zabaldutakoaren arabera. Dirudienez, Gasteizko tranbiako eta Leioako autobusen tailer eta kotxetegietako langileen inguruan hitzartutakoak eragin du negoziazioekin jarraitzeko aukera. Aipatu kazetari sindikatuek adierazi diotenez, kolokan omen zeuden bost lanpostu mantentzeko konpromisoa hartu dute garraio enpresaren zuzendariek. Hala ere, ez dituzte oraindik urriaren 13, 18 eta 25eko lanuzteak bertan behera utziko, aurrerapauso berriak ematen diren ikusi arte behintzat. Batzar berri bat izango dute bihar. Bestalde, "El Correo Español" egunkariak ere zabaldu du gaurkoan Metro Bilbao garraio enpresako arduradunek eta sindikatuek aurrehitzarmena adostu dutela, urriaren 6, 13, 20 eta 27rako aurreikusitako lanuzteak bertan behera uzteko. Argazkian, EuskoTreneko autobusa Areetako Bizkaiko Zubiko plazako geltokian / © EuskoTren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun