Abokatuen operazioko txostena ezkutatzeko eskatu dio Guardia Zibilak epaileari
Apirilaren 14an hiru abokaturen eta beste zazpi euskal herritarren kontrako polizia operazioan agertutako Guardia Zibilaren barne dokumentua (pdf) ezkuta dezan eskatu dio Fernando Grande-Marlaska epaileari erakunde militarrak, "Berria" egunkariak gaur zabaldu duenez. Atxilotutako letraduen artean Arantza Zulueta Lemoizko bizilaguna zegoen. Saioa Agirre zornotzarra, berriz, Sopelako Zipiriñe ikastetxean atxilotu zuten, eskolak ematen ari zela. Erramun Landa Arte Ederretako Fakultateko Pintura irakaslea ere atzeman zuten, bost egun inkomunikaturik egon ostean libre uzteko. Hain zuzen ere, Arantza Zulueta, Iker Sarriegi eta Jon Enparantza abokatuei "tratu bikaina" emateko esaten zuen txostenak, eta gainerako beste zazpi atxilotuei miaketak iraun bitartean ere tratu ona emateko esaten zuen. Beraz, inkomunikatutako atxilotuekin irregulartasunak egiten dituztela agerian uzten du Guardia Zibilaren barne dokumentuak. Enparantzaren etxeko postontzian aurkitu zuten. Argazkian, Arantza Zulueta abokatua eta Lemoizko bizilaguna ere atxilotu zuten polizia operazio hartan / cc-by Askatu.org.
Txosten horren zabalkundea eragozteko eta sumariotik ateratzeko eskatu dio Guardia Zibilak operazioa agindu zuen epaileari, Fernando Grande-Marlaska epaileari. "Terrorismoaren kontrako borrokan poliziak duen jarduera prozedura babeste aldera" eta txostenean agertzen diren poliziak "babesteko asmoz" eskatu dio hori, "Berria" egunkariak aipatu duenez. Gainera, atxilotuen defentsaren bertsioa zalantzan jarri, eta txostena nondik agertu zen ikerketa egiteko ere eskatu dio epaileari, "egoki ikusten badu".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun