Leioako Merkatarien Elkartearekin duela 10 urte sinatutako akordioa luzatzea erabaki du Udalak. Orain hamarkada bat, udalerriko dendari eta tabernariak batzen hasi zirenean, tokiko merkataritza sarea bultzatzeko elkarlana bideratzea erabaki zuten sinatzaileek. Orain, berriz, helburu horiek mantentzeaz gain, sektorean berrikuntza teknologikoak ezartzea bilatzen dute, udal iturriek adierazi dutenez. Akordioren luzapen horri esker, 18.000 euro jasoko ditu Leioako Merkatarien Elkarteak, 2011ra arte. Horretaz gain, urtero 6.000 euroko laguntza jasoko du teknologia berriak ezarriko dituen komunikazio plana aurrera eramateko. Egitasmo horrekin interes orokorreko edukiak (gizarte gaiak, kulturalak, komertzialak...) ikus-entzunezko euskarrietan eskaintzea bilatzen dute. “Zehazki, udalerriko merkataritza biltzen den guneetan berrikuntza teknologikoak bultzatzea bilatzen da. Horretarako pantailen sarea jarriko da herriko denden erakusleihoetan. Pantaila hauetan merkataritza-zerbitzuak eta produktuak iragarriko dira. Baina, horretaz gain bestelako informazioa ere eskainiko da, adibidez agenda kulturala, gizarte informazioa, edota kirol albisteak”, azaldu dute tokiko arduradunek. Euskarri horren bitartez udal informazioa biztanleriari helarazteko konpromisoa hartu du Leioako Udalak. Argazkian, Merkaleioa 2009.
“Akordio hori etorkizunean izango diren elkarkidetza lanen hasiera baino ez da izango, herri mailan aipatutako pantaila informatiboak jartzerako orduan esperientzia eta jakintza maila eskuratzeko”, aipatu dute udal arduradunek. Hitzarmen horren harira, Leioako Udalak Eusko jaurlaritzaren Merkagune Programara aurkeztuko du, Bulebar eta zentro hiritar-zentro inguruko merkataritza-gunean bultzatzeko ekimena, bertan izaten baitira merkatari leioaztarrek antolatutako "outlet" eta gainontzeko azokak. Merkagunek merkataritza arloan interesa duten proiektuak diruz laguntzen ditu. Gauzak horrela, ia 500.000 euroko inbertsioa suposatuko lukeen ekimenak hainbat ekintza aurreikusten ditu: estalita dagoen Bulebarreko zonaldea bikoiztea, Jose Ramon Aketxe plazan musika kiosko bat jartzea edota umeentzako jolastokiak jartzea, besteak beste.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun