Urriko ostegunetan pop-rock kontzertuak izango dira Getxoko hainbat tabernatan
Tokiko pop-rock taldeei bultzada emateko asmoz, “Getxo Zuzenean” kontzertu zirkuitua antolatu du Udalak. Urriaren 7an hasita, ostegunero izango dira musika emanaldiak tabernetan, 20:00etatik 22:00ak arte, sarrera doan. Ekimenaren koordinazioa Getxoko Kultur Etxearen eta Algortako Riff musika dendaren artean egingo dute. Imanol Landa alkateak (mp3) atzo esan duenez, “Udalak interes handia dauka udalerriko gazteen artean dagoen sortzeko ahalmena sustatzeko, eta horien artean, agian, indar gehiena duena musika da. Horregatik, dagoen eskaintzari erantzuna emanez eta euren lana biltzen eta egiten laguntzeko, espresibitateari euskarri bat emanez, pop-rock taldeentzat sustapen eta erakusleiho den ekimen hau antolatu dugu. Musika modernoa jotzen duten taldeak osatzen duten eta publikoaren aurrean jotzeko aukera ez duten udalerriko gazte guztiei aukera hori eman nahi diegu”. Argazkian, Getxoko Kultur Etxeko eta Riff musika dendako arduradunak, Imanol Landa alkatearekin batera / © Getxo Udala.
“Getxo Zuzenean” ekimena urriaren 7an abiatuko dute Bikoizten taldearen emanaldiarekin, Algortako Satistegi kafetegian. Hurrengo kontzertua hilaren 14an izango da, Dani Merinoren eskutik, Itzubaltzeta / Romoko Trokazulo tabernan. El Veloz Murcielago Hindu musika taldeak 21ean joko du, Algortako Piper's taberna irlandarrean; eta ClaRisse izeneko bandak, 28an, Areetako El Comercio kafetegian. Ekimen horretan parte hartu nahi duten taberna guztiek Getxoko Kultur Etxearekin kontaktuan jarri beharko dira, beraiek aztertuko baitute emanaldietarako baldintzak betetzen dituzten ala ez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun