Seme-alaba txikien eskola-gastuak ordaintzen laguntzeko, Getxoko Udalak 124.770 euro banatuko ditu udalerriko familien artean, 2010-2011 ikasturtearen hasieran. Orotara, 10.000 bat ikasle dira, tokiko Hezkuntza arloaren arabera. Imanol Landa alkateak adierazi duenez, “aparteko neurria da, gaur egun ekonomiak bizi duen beheraldiaren harira hartutakoa. Laguntza zuzena da familientzat; eta bestelako erakunde publiko zein pribatuk emandako beste laguntza, diru-sarrera edo baliabideekin batera jaso ahal izango da, Diru-laguntzen Udal Ordenantzak ezarritako baldintzen arabera”. Eskaera-orriak udalerriko herritarren arretarako edozein bulegotan aurkeztu ahal izango dira, urriaren 15era bitartean. Hori udal webgunean zein aipatu bulegoetan eskura daitezke. Orriarekin batera eskatzailearen DNI fotokopia, familia liburua (laguntza eskatzen den semeari edo alabari buruzko datuak jarriz), ikastetxeko ziurtagiria adin txikikoaren izena ipiniz, eta ikasketak egiteko matrikularen kopia ere atxiki beharko dira. Argazkian, udal arduradunak Algortako Egunsentia haur-eskolan.
Eskatzaileek seme-alabak eskolan berme guztiekin sartuko dituztela hitz eman beharko dute, baita irakasleek, ikastetxetako zuzendaritzek zein hezkuntza administrazioek egindako errekerimenduak beteko dituztela ere. Begoña Ezkurra Hezkuntza zinegotziak adierazi duenez, “laguntza hauek jaso ahal izango dituzte Getxoko erroldan gutxienez 2010ko urtarrilaren 1ko antzinatasuna duten pertsonek, Haur, Lehen eta Bigarren Hezkuntzan seme-alabak eskolan izanik, baita antzinakotasun berberarekin erroldatuta duten DBHko mailara artekoak ere (hauek barne)”. Era berean, udalerritik kanpoko eskoletan dauden getxoztarrek ere jaso ahal izango dute. Neskato edo mutiko bakoitzeko eskaera bakarra izapidetu ahal izango da. Subentzioak etxebizitza bakoitzeko diru kopuruaren araberako izango dira, honako irizpide hauei jarraiki: 36.000 euro arteko balio katastrala duen etxebizitza batean bizi diren familiek, gehienez, 25 euroko diru-laguntza jaso ahal izango dute Haur edo Lehen Hezkuntzako ume bakoitzeko eta 40 eurokoa Bigarren Hezkuntzakoentzat. 36.001 eta 50.000 euro arteko balio katastrala duten etxebizitzetan bizi direnentzako diru-laguntzak, gehienez, 20 eurokoak izango dira Haur eta Lehen Hezkuntzan eta 25 eurokoak, Bigarren Hezkuntzari dagokienez. Udal iturriek zehaztu dutenez, 2009an 4.600 eskaera aurkeztu ziren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun