Olatuetatik energia elektrikoa ateratzeko asmoz, Armintzako kostaldean jarri nahi duten BIMEP (Biscay Marine Energy Plataform) azpiegituraren proiektua baztertu eta eta gaur egungo "neurriz kanpoko" energia kontsumoaz hausnarketa sakona egitea exijitu zuen, joan den ostiralean emandako prentsaurrekoan, Eguzki talde ekologistak. Lehenik eta behin, "energia berriztagarri" izenpean garatuko den arren, "irabazi ekonomikoak" helburu dituen beste proiektu handi bat dela salatu zuten naturazaleek. "Ez dugu hitz egiteagatik hitz egiten, proiektu hori ez baita ez iraunkorra ez ekologikoa", adierazi zutenez. Batetik, proiektuak ingurumenean izango duen eraginaren inguruko azterketarik zergatik ez den egin galdetu zuten. Zentzu horretan, Armintza inguruko bizilagun nahiz ekologistei "proiektuaren inguruko informaziorik ez" dietela eman salatu ostean, publiko egin duten informazio apurra "kezkagarria" dela esan zuten. Besteak beste, "nekazaritza lurrak desjabetuko dituztela" adierazi zuen Eguzkik; baita proiektuaren bultzatzaileek Lemoizko zentral nuklear zaharreko eremua erabiltzeari uko egin diotela ere, "hori egiteak nekazaritza eremuen okupazioa txikituko lukeen arren". Argazkian, Armintzako kostaldea.
Armintzako BIMEP delakoak sortutako energiaren %20 erabiliko lukete Armintza hornitzeko, eta gainerakoa sare orokorrera bideratuko lukete. Birbanaketa horretan "energia galera garrantzitsua" gertatuko litzatekeela uste du Eguzkik. Bestalde, proiektuak inguruko "arrantzaleek eskura duten azken kala arriskuan" jarriko lukeela adierazi zuten, baita itsaslabar eta nekazaritza eremu ugari suntsituko lituzkeela ere. "Begi-inpaktua, uraren berotzea eta sedimentuen kutsatzearen ondorioz floran eta faunan gaitzen sorrera" izango lirateke proiektuaren beste ondorioetako batzuk, ekologisten arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun