Falangearekiko loturak ahaztu dituen erakusketa jarri du Areetan "El Correo Español"-ek

"El Correo Español" egunkariaren azal historikoen erakusketa zabaldu zuten atzo Areetako Txurruka moilan. Bertan, XX. mendearen gertaera aipagarrienak azaltzen ei dituzten berrogei lehen orrialde aurkezten dira. Erakustaldia hilaren 25era arte egongo da indarrean, Bizkaiko Zubia eta moila bitartean. Ekimena "El Correo Español" kazetaren "mendeurrenaren" baitan kokatu dute. Hala ere, aipatu egunkari hori 1937ko uztailaren 6an jaio zen, hau da, Bilbo frankisten eskuetan geratu eta 18 egunetara. "El Correo Español. Diario de Falange Española Tradicionalista y de las JONS" izenarekin sortua, frankistek "Euzkadi" egunkari euskaldunari desjabetutako inprimategiaz baliatu zen. Urte bat beranduago, 1938an, Ybarra anaiek 1910ean sortutako "El Pueblo Vasco" egunkari monarkikoari zabaltzeko debekua ezarri zion Administrazio frankistak. Halabeharrez, "El Correo Español"ekin batu behar izan zen. Gauzak horrela, egunkari espainol horrek ez ditu 100 urte bete, baizik eta 73. Argazkian, erakusketan ageri ez den Bilboko okupazioaren urteurreneko azala, "Franco, Franco, Franco" lelopean.