ETBk aipatu ekitaldia grabatuko du, eta dokumental gisa emango du zuri-beltzez. Antzezpena Gontzal Mendibilek zuzenduko du, antzezte-zereginetan 60 aktore eta figurantek gidatu beharko dituela. Urte odoltsu eta latz haietan, 36ko Gerra bete-betean zela, gauzatu zen gertaera historiko haren giroan sartu beharko ditu. Guztiek, Gobernu-hartzeko hitzaldiek, ekitaldi haien mahaiburutza foru-tankeraz eratzeak, gudarien desfileek eta lehenengo Eusko Jaurlaritzari egindako arma-aurkezteak gogoraraziko dituzte; 1936ko urriko 7 hartan bizi izandako une zirraragarriak. Garaiko jantzi eta attrezzo eta guzti.
Gainera, gerra-fronteko irudiak ere proiektatuko dira. Ekitaldian, bestalde, Ertzaintzaren Musika Bandak, Gernikako Gaudeamus Koralak, Beti Jai Alaiko dantzariek eta Bilboko Udal Txistulari Bandak ere parte hartuko dute.
Agirre ohoratzea
Gontzal Mendibilek sortutako antzezpenean, eta beraren zuzendaritzapean, Ramon Agirre aktoreak hezurmamituko du Jose Antonio Agirre. 36ko Eusko Jaurlaritzaren osakideek, ekitaldira etorritako kontsulek, Espainiako Errepublikaren ordezkari instituzional zenbaitek eta usadio zaharrean eratutako mahaiburutzak emango diote bizia sinbolismoz betetako ekitaldi zirraragarri bati. "Agirre lehendakariaren balioek eta ondareak xedatzen dute beraren heriotzaren 50. urteurrena. Eta ekitaldi honen asmoa, hain zuzen ere, gure lehenengo lehendakariaren figura ohoratzea da, Eusko Jaurlaritza haren zilegitasun demokratikoa eta politikoa errebindikatzea eta belaunaldi hark herri honen askatasunaren eta burujabetzaren alde egindako lana agerraraztea", azaldu dute AL50 Batzordeko arduradunek.
Orain 74 urte, gaurko datan Jose Antonio Agirre eta Lekubek Gernikako arbolaren pean lehenengo Eusko Jaurlaritzako Lehendakaritza hartzeko egin zuen zin historikoa antzeztuko dute gaur arratsaldean, Gernikan. Hitzordua, jatorrizko zinaren lekuan eta orduan jarri dute, Gernikako Batzar Etxean, 16:30etan. Ekitaldia Eusko Jaurlaritzaren lehenengo lehendakari eta udal agintari getxoztarraren heriotzaren 50. urteurrena gogoratzeko AL50 Batzordeak antolatutako ekimenen artean kokatzen da. Jose Antonio Agirreren rola bere iloba den Ramon Agirre aktoreak beteko du. Argazkian, apirilaren 15ean Jose Antonio Agirreri egin zion omenaldia Getxoko Udalak, Negurin plaka oroigarria jarriz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun