Erakusketaren bitartez, udalerriaren historia erakutsiko da, bere lehenengo biztanleek utzi zituzten aztarnak jarraituz. Aipatu aztarnak, hainbat arkeologok Azkorri eta Barinatxeko labarretan, Munarrikolandan, eta herrigunean azterkatu dituzte; eta horiei esker, ikusi ahal izango da Sopelaren bilakaera orain dela 40.000 urtetik gaur egunera arte.
Bisita gidatuak
Europar Ondareko Jardunaldien barruan gidatutako bisitak izango dira urriaren 17an, igandea, eta 23an, larunbata. Batean zein bestean, irteera goizeko 9etan jarri dute Larrabasterrako Urko kiroldegiko aparkalekuan, Munarrikolandatik ibilbidea egiteko. Bertan, orain dela 5.000 urte herritarrek eraiki zituzten hilobiak aurkitu daitezke. Gainera, nola eraiki zituzten ikasiko dute parte-hartzailek. "Oso zaila da hilobi hauek ikustea. Arrazoi nagusia eraiki zutenetik igaro den denbora da. Urteak aurrera joan ahala, aztarnak hondatuz joan dira. Horregatik, erne ibili behar da hilobiak ikusteko", azaldu dute tokiko arduradunek. Bueltan, Santa Mariñe baseliza, Erdi Arokoa, eta Fraidemendiko monolitoa, “Munarri” izenez ezagutua, bisitatuko dituzte. Udaletik ohartarazi dutenez, tokiak mugatuak dira. Ibilbidearen iraupena lau ordukoa izango da. Argibide gehiagorako zein lekua erreserbatzeko 944 065 519 telefono zenbakira dei daiteke.
Sopelak Bizkaiko Foru Aldundiaren Europar Ondareko jardunaldietan parte hartuko du lehenengo aldiz. Hori dela eta, datorren ostegunetik aurrera, udalerriak hainbat ekintza antolatu ditu: hitzaldi, erakusketa txiki eta bisita gidatu bana. Solasaldia Joseba Rios Historian doktore eta Kantabriako Unibertsitateko irakasleak emango du ostegunean, hilak 14, arratsaldeko 7etan, Kurtzio kultur etxean. Bertan, udalerrian egin diren lan arkeologiko guztiak azalduko dituzte, joan zen mendearen hasieran Joxemiel Barandiaran antropologoak ikerketak egiten hasi zenetik aurrera. "Hortaz, aurkitutako aztarnez, gure herriaren iragana berreraiki ahal izango dugu; Erdi Paleolitikotik Erdi Arora, Goi Paleolitikotik, Mesolitikotik, Neolitikotik, Burdin Arotik eta Erromatar Garaitik igaroz", zehaztu dute udal iturriek. Bisita gidatuak hilaren 17an eta 23an izango dira. Argazkian, interes arkeologiko eta geologiko handia duten eskualdeko labarrak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun