Aurten ere, Getxo udalerriko gazteek eskurago izango dute "Gaztezulo" aldizkari gazte eta euskalduna. Izan ere, aldizkari hori sustatzen duen "Irakurriz Gozatu" egitasmoan parte hartuko du berriro ere Getxoko Udaleko Gazteria Zerbitzuak. Horri esker, hezkuntza zentroei Gaztezulo aldizkaria sei hilabetez eta dohainik jasotzeko aukera ematen zaie. Aldizkaria Batxilergoko 1. mailako ikasleei dago zuzenduta. Joan den ikasturtean Getxo udalerriko 249 ikaslek hartu zuten parte egitasmoan: 156 Aixerrota Institutukoak ziren, 46 Azkorri ikastetxekoak, 25 Julio Caro Baroja-Getxo I Institutukoak eta beste 22 Fadura Institutukoak. 2008an, berriz, 237 ikaslek gozatu zuten "Gaztezulo"z. Iniziatibaren helburua, euskaraz idatzitako produktuen kontsumoa eta, oro har, irakurtzearen gozamena sustatzea da. Ekimena Araba, Bizkaia eta Gipuzkoako hainbat udalen eta ikastetxeren laguntzarekin egiten da. Argazkian, Algortako Bost Axola koadrilako lagunek Gaztezulo.com-era bidalitako jai irudia / © Mirane.
Sei hilabeteko epealdia bukatuta, Iazko ikasturtean parte hartu zuten 249 ikasleetatik 14k egin zuten harpidetza, doan jasotzeko aldia behin amaituta. Beste 96 gaztek agerkari elektronikora harpidetu egin ziren. Gainera, ebaluazio-txostenean jasotzen denez, ekimenera bildutako pertsonen %76k dio orain lehen baino gehiago irakurtzen duela euskaraz. 2009-2010 ikasturteko programaren kostea 1.754,48 eurokoa izan zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun